Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:

Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

•    15 ՏԱՐԻ ԱՌԱՋ. 2006 ԹՎԱԿԱՆԻ ՓԵՏՐՎԱՐԻ 15-21

«Հսկայական հիասթափություն»

Փետրվարի 15-ին Եվրոպայի Խորհրդի Խորհրդարանական Վեհաժողովի (ԵԽԽՎ) նախագահ Ռենե վան դեռ Լինդենը հայտարարել էր, որ «խորապես հիասթափված է» Հայաստանի եւ Ադրբեջանի նախագահների բանակցությունների վերջին փուլի ընթացքում «ճեղքման» բացակայությամբ:

Ռենե վան դեռ Լինդենը

Լուսանկարը` REUTERS

«Պետք է մեկ անգամ եւս կրկնեմ, որ առանց այս խնդրի կարգավորման տարածաշրջանում չի լինի կայուն զարգացում եւ բարեկեցություն, իսկ երեխաները չեն ունենա ապագա», - հայտարարել էր ԵԽԽՎ նախագահը` հորդորելով կողմերին «հնարավորինս շուտ վերսկսել քննարկումները` նոր վճռականությամբ»:

Սեմնեբիի նշանակումը

Փետրվարի 21-ին Եվրամիության Խորհուրդը հաստատել էր շվեդ դիվանագետ Պիտեր Սեմնեբիին Հարավային Կովկասում ԵՄ հատուկ ներկայացուցչի պաշտոնում:

Պիտեր Սեմնեբին

Լուսանկարը` ԵԱՀԿ

Պիտեր Սեմնեբիի մանդատը նախատեսում էր, որ նա պետք է աջակցություն ցուցաբերի Հայաստանին, Ադրբեջանին եւ Վրաստանին` օրենքի գերակայության, ժողովրդավարության, մարդու իրավունքների, աղքատության կրճատման ոլորտներում բարեփոխումներ անցկացնելու հարցում:

•    10 ՏԱՐԻ ԱՌԱՋ. 2011 ԹՎԱԿԱՆԻ ՓԵՏՐՎԱՐԻ 15-21

Կոալիցիայի հայտարարությունը

Փետրվարի 17-ին Հայաստանի նախագահի նստավայրում քաղաքական կոալիցիայի կողմերի` Հայաստանի Հանրապետական կուսակցության (ՀՀԿ), «Բարգավաճ Հայաստան» կուսակցության եւ «Օրինաց երկիր» կուսակցության միջեւ ստորագրվել էր «Քաղաքական կոալիցիայի հայտարարություն»:

Արթուր Բաղդասարյանը, Գագիկ Ծառոկյանը, Սերժ Սարգսյանը 2011թ. փետրվարի 17-ին

Լուսանկարը` Ֆոտոլուր

Փաստաթղթում, մասնավորապես ասված էր, որ «քաղաքական կոալիցիան 2013 թվականի նախագահական ընտրություններում  հանդես կգա միասնական թեկնածուով` ի դեմս գործող նախագահի, դրանով իսկ երաշխիքներ ստեղծելով ապահովելու փոփոխությունների հետագա շարունակականությունն ու  մեր երկրի կայուն առաջընթացը հաջորդող հինգ տարիների ընթացքում»:

Օսկանյանի մտահոգությունը

Փետրվարի 18-ին Հայաստանի նախկին ԱԳ նախարար, «Սիվիլիթաս» հիմնադրամի նախագահ Վարդան Օսկանյանն հայտարարել էր, որ «մենք կարող ենք կորցնել Ղարաբաղի ժողովրդի ինքնորոշման իրավունքը»:

Լուսանկարը` Ֆոտոլուր

«Ակնհայտ է Ղարաբաղի շուրջ անորոշությունը, չկա այն բանակցված փաստաթուղթը, որի շուրջ կողմերը համաձայն են շարունակել բանակցությունները: Ես լուրջ մտահոգություն ունեմ, որ Ղարաբաղի ժողովրդի ինքնորոշման իրավունքը, որ մեծ ջանքերով, տարիների բանակցային գործընթացի արդյունքում հաջողվեց ամրագրել բանակցվող փաստաթղթում, այսօր մենք կարող ենք կորցնել», - ասել էր Օսկանյանը:

•    5 ՏԱՐԻ ԱՌԱՋ. 2016 ԹՎԱԿԱՆԻ ՓԵՏՐՎԱՐԻ 15-21

«Զսպման համակարգը»

Հայաստանի պաշտպանության նախարարի առաջին տեղակալ Դավիթ Տոնոյանը փետրվարի 18-ին Վիեննայում «Ռազմական դոկտրինալ մոտեցումներ» խորագրով ԵԱՀԿ սեմինարում ասել էր, որ հայկական զինված ուժերը «Ստատիկ պաշտպանությունից» կանցնեն «Սանձահարման/Զսպման համակարգին»:

«Հայաստանի անվտանգության ապահովման նպատակներին հասնելու համար եւ ԵԱՀԿ Մինսկի խմբի հովանու ներքո իրականացվող բանակցային գործընթացի համար նպաստավոր պայմաններ ձեւավորելու նպատակադրմամբ՝ նախատեսում ենք գործադրել մի շարք միջոցներ: Դրանցից է «Սանձահարման/Զսպման համակարգը» (Deterrence system), որը Հայաստանը գործի է դնում առկա զինված դիմակայությունը նվազեցնելու համար»,- ասել էր Դավիթ Տոնոյանը:

Դավիթ Տոնոյանը՝ 2016 թվականին

Լուսանկարը` ՀՀ ՊՆ

Նրա խոսքով՝ «Սանձահարումը/Զսպումը» Հայաստանի ԶՈՒ դոկտրինալ մոտեցումներում հետզհետե դուրս է մղում «Ստատիկ պաշտպանության» հայեցակարգը, որը «հակառակորդի կողմից կարող էր դիտարկվել որպես անբավարար հզորության վկայական:

«Իրականում, 25 տարվա պաշտպանողական քաղաքականությունը հանգեցրել է հակառակորդի կողմից սադրիչ գործողությունների ավելացմանը: Այնպես որ՝ Հայաստանը իրականացնելու է որակական լուծումներ՝ քանակական անհավասարակշռությունները չեզոքացնելու համար, միաժամանակ խստորեն պահպանելով սպառազինությունների վերահասկման ոլորտում առկա սահմանափակումները: «Սանձահարման/Զսպման համակարգը» կիրականացվի ինչպես արձագանքող, այնպես էլ կանխարգելող եղանակով»,- նշել էր պաշտպանության նախարարի առաջին տեղակալը:

Արա Թադեւոսյան