Երեւան: Մեդիամաքս: ՀՀ Քաղաքացիական ավիացիայի գլխավոր վարչությունում /ՔԱԳՎ/ տեղյակ չեն Երեւանում գրասենյակ բացելու Turkish Airlines-ի մտադրությանը` Երեւան-Ստամբուլ-Լոս-Անջելես երթուղով չվերթներ կատարելու նպատակով:
Այդ մասին այսօր Մեդիամաքսին ասել են ՔԱԳՎ մամուլի ծառայությունում:
Bloomberg գործակալությունը, վկայակոչելով Hurriyet թերթը, այսօր տեղեկատվություն է տարածել Երեւանում գրասենյակ բացելու Turkish Airlines-ի ղեկավար Համդի Թոփչուի մտադրության մասին` Երեւանի եւ Լոս-Անջելեսի միջեւ Ստամբուլով տարանցիկ չվերթներ կազմակերպելու նպատակով:
Մեդիամաքսը հիշեցնում է, որ Լոս-Անջելեսի հայկական կազմակերպությունների ներկայացուցիչները վերջերս հանդես էին եկել բողոքով Turkish Airlines-ի «դեմքը» դառնալու հայտնի բասկետբոլիստ Կոբե Բրայանտի որոշման դեմ:
