Երեւան: Մեդիամաքս: Երեւանում System Of A Down (SOAD)-ի վոկալիստ Սերժ Թանգյանի հավանական համերգի հետ կապված հարցերը դեռեւս գտնվում են քննարկման փուլում:
Մեդիամաքսին տված հարցազրույցում այս մասին հայտնել է երգչի մենեջեր Ջորջ Տոնիկյանը:
«Ներկայումս չենք կարող որեւէ մանրամասներ հայտնել: Հարցերը քննարկման փուլում են», - ասել է Տոնիկյանը:
Նախորդ շաբաթ Սերժ Թանգյանի հետ համագործակցող ստեղնահար Էրվին Խաչիկյանը www.Bravo.am-ին հայտնել էր, որ օգոստոսի վերջին Երեւանում նախատեսված է SOAD-ի վոկալիստի համերգը Հայաստանի պետական ֆիլհարմոնիկ նվագախմբի հետ:
2010 օգոստոսին Սերժ Թանգյանը մենահամերգ էր տվել Երեւանում:
Մի քանի ամիս առաջ Սերժ Թանգյանը վերամիավորվել է SOAD-ի իր գործընկերների հետ` համերգային շրջագայության համար:
Այսօր System Of A Down-ը ելույթ կունենա Մոսկվայում:
