Երեւան: Մեդիամաքս: ՀՀ պաշտպանության նախարարությունն այսօր հրապարակել է Հայրենական մեծ պատերազմում տարած հաղթանակի 70-ամյակի առթիվ Երեւանում եւ մարզերում կազմակերպվող միջոցառումների ծրագիրն ու ժամանակացույցը:

Մայիսի 9-ի միջոցառումները կմեկնարկեն առավոտյան ժամը 10:00-ին՝  ՀՀ Ազգային ժողովի, կառավարության, ՊՆ, Զինված ուժերի, օտարերկրյա դիվանագիտական ու միջազգային կազմակերպությունների ներկայացուցիչների, վետերանների՝ «Հաղթանակ» զբոսայգի այցելությամբ, որտեղ հարգանքի տուրք կմատուցվի Անհայտ զինվորի հուշակոթողին:

Ժամը 10:30-ին Անհայտ զինվորի հուշակոթողի մոտ տեղի կունենա ՀՀ ԶՈՒ, ՌԴ սահմանապահ եւ 102-րդ բազայի միացյալ ստորաբաժանումների զինվորական շքերթը:

Շքերթից հետո կառավարական հանձնաժողովի անդամները, տոնակատարության մասնակիցներն ու պատերազմի վետերանները Մայր Հայաստան զինվորական թանգարանում կդիտեն Մեծ հաղթանակին վերաբերվող նորացված ցուցադրությունները:

Ժամը 13:00-ին «Հաղթանակ» զբոսայգում տեղի կունենա հայրենասիրական երգերի համերգային ծրագիր՝ ՊՆ նվագախմբի, ՀՀ ՊՆ Երեւանի կայազորի Սպայի տան «Զորական» ու «Սարդարապատ» համույթների մասնակցությամբ:

Ժամը 22:00-ին Երեւանում տեղի կունենա 70 համազարկով տոնական հրավառություն:

Գյումրիի «Մայր Հայաստան» հուշահամալիրում ժամը 10:00-ին տեղի կունենան ՀՀ զինված ուժերի եւ ՌԴ ԶՈՒ 102-րդ բազայի համահավաք վաշտերի զինվորական շքերթը:

ՀՀ ՊՆ-ն տեղակացնում է, որ միջոցառումներ կկազմակերպվեն ՀՀ նաեւ այլ քաղաքներում: