1989 թվականի ամռանը Լոնդոնի Metropolis Studios ստուդիայում ձայնագրվեց Deep Purple խմբի «Smoke on the water» հիթի «աստղային» տարբերակը՝ 1988 թվականի Սպիտակի երկրաշարժից տուժած Հայաստանին օգնելու նպատակով: Rock Aid Armenia-ի 30-ամյակին նվիրված հատուկ նախագիծը բացահայտում է ծրագրի մանրամասները: 

Նախագիծն իրականացվում է Հայաստանում Բրիտանական Խորհրդի գրասենյակի աջակցությամբ:

Rock Aid Armenia-ի հիմնադիր Ջոն Դին Մեդիամաքսին պատմել է, որ «Smoke on the water»-ի ձայնագրության ժամանակ հարվածային գործիքներ պետք է նվագեր Rush խմբի անդամ Նիլ Փըրթը: 

«Նա մեծ անհամբերությամբ սպասում էր ձայնագրության մեկնարկին: Ցավոք, քանի որ ստիպված եղանք փոխել առաջին ձայնագրության՝ նախապես հաստատված օրը, Նիլը չկարողացավ մասնակցել: 

Queen խմբից Ռոջեր Թեյլորը համաձայնեց փոխարինել Նիլին:

Շատ հիասթափված էի, որ Նիլը չի կարող մասնակցել, բայց հենց Ռոջերը սկսեց նվագել, նա եւ Քրիս Սքույաերը հարվածային գործիքների ու բաս-կիթառի այնպիսի «գրուվ» (groove) արեցին, որը գերազանցեց բոլոր սպասելիքներս: Ռոջերը եւ Քրիսը հիանալի էին աշխատում միասին», - հիշում է Ջոն Դին:

Այս տեսանյութը հաստատում է Ջոնի խոսքերը.

Կարդացեք նաեւ. 

«Կոմսոմոլկայի» 1989-ի անդրադարձը Rock Aid Armenia-ին

Դէվիդ Գիլմորն օգնեց ձեւավորել Rock Aid Armenia-ի աստղաբույլը

***

2019 թվականի հունիսի 5-ին Երեւանում տեղի ունեցավ հանդիսավոր երեկո` նվիրված Rock Aid Armenia-ի 30-ամյակին: Երեկոյին մասնակցելու նպատակով Երեւան էին ժամանել ռոքի լեգենդները՝ Deep Purple-ի վոկալիստ Իէն Գիլանը եւ Black Sabbath-ի կիթառահար Թոնի Այոմին, ինչպես նաեւ Rock Aid Armenia նախագծի հեղինակ Ջոն Դին: Այցի եւ տոնակատարության կազմակերպիչներն էին Մեդիամաքս մեդիա ընկերությունը եւ DoSomething կազմակերպությունը (Ավստրալիա):

Rock Aid Armenia ծրագրի 30-ամյակի եւ ռոք աստղերի այցի գլխավոր հովանավորը IDBank-ն էր: Միջոցառման գործընկերը Koor գինին էր: