Երեւան: Մեդիամաքս: Կարմիր Խաչի Միջազգային Կոմիտեի միջնորդությամբ այսօր Հայաստան է վերադարձվել Ադրբեջանում սպանված ՀՀ քաղաքացի, Տավուշի մարզի Չինարի գյուղի բնակիչ 31-ամյա Կարեն Պետրոսյանի աճյունը:
Մեդիամաքս-ի թղթակցին այս տեղեկությունը հայտնել է ԿՄԽԿ երեւանյան գրասենյակի մամուլի խոսնակ Զառա Ամատունին:
Մեդիամաքս-ը հիշեցնում է, որ նախօրեին Երեւանում գտնվող Եվրոպայի խորհրդի մարդու իրավունքների հանձնակատար Նիլս Մուիժնիկսը կոչ էր արել Բաքվին վերադարձնել ՀՀ քաղաքացու դին:
Մեդիամաքս-ը հիշեցնում է, որ Կարեն Պետրոսյանի մահվան փաստով լուրջ մտահոգություն են հայտնել ԵԱՀԿ Մինսկի խմբի եռանախագահ երկրները: ԱՄՆ Պետդեպարտամենտի պաշտոնական ներկայացուցչի գրասենյակը Ադրբեջանի կառավարությանը կոչ էր արել անցկացնել լիարժեք եւ թափանցիկ հետաքննություն Կարեն Պետրոսյանի մահվան հանգամանքները պարզելու ուղղությամբ եւ հրապարակել արդյունքները:
Ֆրանսիայի ԱԳՆ խոսնակ Ռոմեն Նադալը կոչ էր արել Ադրբեջանի իշխանություններին արագորեն վերադարձնել նրա մարմինը եւ ամբողջապես լույս սփռել նրա մահվան հանգամանքների վրա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: