Երեւան: Մեդիամաքս: Այսուհետ ՀՀ Կենտրոնական ընտրական հանձնաժողովի պաշտոնական կայքից հնարավոր է տեղեկատվություն ստանալ կոնկրետ հասցեում հաշվառված անձանց վերաբերյալ:
Դա կարելի է անել այս հղումով:
Ինչպես հաղորդում է Մեդիամաքս-ը, ԿԸՀ այս նոր նախաձեռնությունը, որն իրականացվել է ԵԱՀԿ երեւանյան գրասենյակի եւ ԱՄՆ ՄԶԳ հայաստանյան առաքելության աջակցությամբ, ուղղված է Հայաստանում ընտրական գործընթացի թափանցիկության ապահովմանը:
ԿԸՀ նախագահ Տիգրան Մուկուչյանը, խոսելով նոր հնարավորության մասին, ասել է, որ նախկինում ընտրողների կողմից դժգոհություններ էին լինում նույն բնակարանի հասցեում հաշվառված անձանց հետ կապված:
«Սա լուրջ գործոն է, որը թույլ կտա լիարժեքորեն հետեւելու ընտրողների ցուցակներին: Այժմ, եթե որեւէ խնդիր ծագի տվյալ հասցեում հաշվառված անձի հետ կապված, ապա քաղաքացիները կարող են նախօրոք դիմել ծագած խնդրի լուծման համար»,- ասել է Տիգրան Մուկուչյանը:
ԵԱՀԿ երեւանյան գրասենյակի ղեկավար Անդրեյ Սորոկինն ասել է, որ նոր նախաձեռնությունը կնպաստի ընտրությունների նկատմամբ հասարակության վստահության բարձրացմանը:
ԱՄՆ ՄԶԳ Հայաստանյան առաքելության Ժողովրդավարության եւ կառավարման գրասենյակի ղեկավար Սթիվեն Բրագերն իր հերթին նկատել է, որ անցած տարիների ընթացքում «մենք առաջընթաց ենք նկատել ընտրությունների վարչարարության տեսանկյունից»: «Ընտրությունները թափանցիկ դարձնելու ԿԸՀ ջանքերն ակնհայտ են»,- ասել է Սթիվեն Բրագերը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: