Երեւան: Մեդիամաքս: Բուդապեշտում Ադրբեջանի դեսպան Վիլայաթ Գուլիեւը, խախտելով դիվանագիտական պրակտիկայի չգրված օրենքը, այսօր հայտարարություն է արել Հունգարիայի ԱԳ նախարարության անունից:

Ինչպես հաղորդում է Տրենդը, Վիլայաթ Գուլիեւն ասել է, որ «Հունգարիայի ԱԳՆ-ն անհեթեթություն է որակել հաղորդագրությունն այն մասին, որ Բուդապեշտը քննարկում է Բաքվի հետ հարաբերությունները կասեցնելու հարցը:

Գուլիեւն ասել է, որ այսօր հանդիպել է Հունգարիայի ԱԳՆ Արեւելյան Եվրոպայի,  Հարավային Կովկասի եւ Կենտրոնական Ասիայի դեպարտամենտի տնօրեն Էրնե Կեշնենիի հետ, ով իբր այդ լուրը «անհեթեթություն» է անվանել:

Իրականում Վիլայաթ Գուլիեւի հապճեպ արված հայտարարությունը կարող է վկայել այն մասին, որ Մեդիամաքս-ի աղբյուրի տեղեկատվությունը համապատասխանում է իրականությանը: Բացի այդ, եթե Գուլիեւի եւ Կեշնենիի հանդիպումը իրոք կայացել է այսօր, ապա դա տեղի է ունեցել վաղ առավոտյան, ինչը եւս վկայում է այն մասին, որ Ադրբեջանի դեսպանը շտապ քննարկման ենթակա հարցեր է ունեցել:

Հունգարիան դիտարկում է Ադրբեջանի հետ հարաբերությունները կասեցնելու հարցը: Այս մասին Մեդիամաքս-ին հայտնել է ԵԱՀԿ Վիեննայի Քարտուղարության աղբյուրը: Նրա խոսքով, այդ հարցը նախօրեին քննարկվել է ԵԱՀԿ-ում հունգարական առաքելության աշխատակցի եւ ամերիկյան դիվանագետի ոչ պաշտոնական ճաշի ժամանակ:

Հունգարացի դիվանագետն ասել է ամերիկացի գործընկերոջը, որ վերջնական որոշում կայացված չէ, նշելով, որ Ադրբեջանի հետ հարաբերությունների կասեցումը դիտարկվում է որպես միջոց` դուրս գալու այն բարդ արտաքին եւ ներքին քաղաքական իրավիճակից, որում Հունգարիան հայտնվեց ադրբեջանցի մարդասպանին Ադրբեջան փոխանցելուց հետո, որտեղ նրան անմիջապես ներում շնորհվեց: Բացի դրանից, նման որոշումը խորհրդանշական քայլ կլինի Երեւանի հետ հարաբերությունները վերականգնելու համար, հավելել է դիվանագետը: