Երեւան: Մեդիամաքս: ՀՀ նախագահ Սերժ Սարգսյանն այսօր Թբիլիսիում ասել է, որ «այս տարին մեր երկու երկրների միջեւ համագործակցության ակտիվության առումով աննախադեպ է»:

Սերժ Սարգսյանն այսօր երկօրյա պաշտոնական այցով ժամանել է Թբիլիսի:

«Վերջին երկու տարիներին մեր հարաբերությունները շատ դինամիկ զարգացում են ապրել. կայացել են շուրջ երկու տասնյակ բարձր մակարդակի այցելություններ՝ ներառելով մեր համագործակցության բոլոր ոլորտները», - ասել է ՀՀ նախագահը` հանդես գալով իր վրացի պաշտոնակցի հետ համատեղ մամուլի ասուլիսում:

Խոսելով հեռանկարային տնտեսական ծրագրերի մասին, Սերժ Սարգսյանն ասել է, որ «գալիք ամիսներին մենք մեկնարկում ենք Հյուսիս­հարավ լավագույն չափանիշներով ավտոմայրուղու կառուցման աշխատանքները, որը, միանալով Վրաստանի տարածքում Նինոծմինդա­Բաթումի վերանորոգվող ավտոճանապարհի հետ, հնարավոր կդարձնի Պարսից ծոցից դեպի Վրաստանի նավահանգիստներ բեռների արագ եւ հարմարավետ տեղափոխումը»:

«Ամեն անգամ գալով Վրաստան՝ համոզվում եմ, որ մենք շատ քիչ ենք շփվում: Իմ ցանկությունն է, որպեսզի գոնե տարին մի քանի անգամ բոլոր մակարդակի ղեկավարները հանդիպեն, որովհետեւ դա անհրաժեշտ է ոչ միայն որոշակի խնդիրներ լուծելու համար, այլեւ երիտասարդ սերնդին ի ցույց դնելու մեր հարաբերությունների բարձր մակարդակը: Մեզ համար երկու-երեք շատ սկզբունքային հարցերում այս տարի մենք առաջընթաց արձանագրեցինք, ինչի համար շատ շնորհակալ եմ թե՛ նախագահին, թե՛ Վրաստանի կառավարությանը», - ասել է Սերժ Սարգսյանը:

Սերժ Սարգսյանը խոսել է նաեւ Հայաստանի ազգային անվտանգության ծառայության եւ Վրաստանի ներքին գործերի նախարարության միջեւ սահմանային ոլորտում համագործակցության մասին համաձայնագրի մասին:

«Այն կնպաստի մերձսահմանային գյուղերի բնակիչների խնդիրների լուծմանն ուղղված մեխանիզմների կատարելագործմանը: Գաղտնիք չէ, որ շատ տեղերում, ինչպես ասում են՝ «իրար մեջ ենք ապրում», եւ խնդիրներ չառաջանալու նպատակով է հենց այսպիսի փաստաթուղթ ստորագրվում», - նկատել է ՀՀ նախագահը: