Երեւան: Մեդիամաքս: ՀՀ Ազգային ժողովն այսօր փակ, գաղտնի քվեարկությամբ ՀՀ գլխավոր դատախազ է ընտրել Արթուր Դավթյանին:

Արթուր Դավթյանի թեկնածությանը կողմ է քվեարկել 97 պատգամավոր, դեմ՝ 3-ը։

Հիշեցնենք, որ գլխավոր դատախազի պաշտոնը թափուր էր մնացել օգոստոսի 4-ին Գեւորգ Կոստանյանի հրաժարականից հետո։

Արթուր Դավթյանը ծնվել է 1978թ․ դեկտեմբերի 8-ին Շիրակի մարզի Հոռոմ գյուղում:

Ավարտել է Երեւանի պետական համալսարանը, իրավաբանական գիտությունների թեկնածու է։

2012-2013 թթ. եղել է Երեւան քաղաքի Շենգավիթ վարչական շրջանի դատախազ, 2013-2016 թթ.՝ Երեւանի դատախազ։ 2016թ. հունիսի 22-ին նշանակվել էր ՀՀ գլխավոր դատախազի տեղակալ։

2000-2006 թթ. դասախոսել է ԵՊՀ քրեական դատավարության եւ կրիմինալիստիկայի ամբիոնում։ Դասախոսում  է նաեւ Հայաստանի ֆրանսիական համալսարանում, Երեւանի պետական մանկավարժական համալսարանում:

Ամուսնացած է, ունի երկու դուստր։