Երեւան: Մեդիամաքս: ՀՀ նախագահ Սերժ Սարգսյանն այսօր հրամանագիր է ստորագրել Արմեն Պապիկյանին ՀՀ արտաքին գործերի նախարարի տեղակալ նշանակելու մասին:

Արմեն Պապիկյանը 1990-1995 թթ. սովորել եւ ավարտել է «Գլաձոր» կառավարման համալսարանի միջազգային հարաբերությունների ֆակուլտետը՝ միջազգայնագետ-պատմաբանի որակավորմամբ։

2000թ. սովորել եւ ավարտել է ԱՄՆ Թաֆթսի համալսարանի Ֆլեթչերի իրավունքի եւ դիվանագիտության դպրոցը։

1999թ. վերապատրաստվել է Ջորջ Մարշալի անվան Անվտանգության ուսումնասիրությունների եվրոպական կենտրոնում։

2001թ. վերապատրաստվել է ՆԱՏՕ-ի պաշտպանության քոլեջում (Հռոմ)։

1997-1999 թթ. աշխատել է որպես ՀՀ ԱԳՆ ռազմաքաղաքական վարչության երկկողմ ռազմական համագործակցության բաժնի կցորդ, ապա՝ երրորդ քարտուղար։

1999-2002 թթ. եղել է ՀՀ ԱԳՆ սպառազինությունների վերահսկաման եւ միջազգային անվտանգության վարչություն ՆԱՏՕ-ի հետ համագործակցության բաժնի երկրորդ քարտուղար։

2002-2005 թթ. եղել է ՄԱԿ-ի Ժնեւի գրասենյակում ՀՀ մշտական ներկայացուցչության երկրորդ քարտուղար, միաժամանակ՝ Շվեյցարիայում ՀՀ դեսպանության երկրորդ քարտուղար։

2005-2007 թթ. աշխատել է ՀՀ ԱԳՆ-ում՝ որպես սպառազինությունների վերահսկաման եւ միջազգային անվտանգության վարչություն սովորական սպառազինությունների վերահսկման բաժնի վարիչ։

2007-2011 թթ. եղել է ԵԱՀԿ-ում ՀՀ մշտական ներկայացուցչության խորհրդական - ՀՀ մշտական ներկայացուցչի տեղակալ։

2011թ. եղել է ՀՀ ԱԳՆ Եվրոպայի վարչության խորհրդական, նույն թվականի սեպտեմբերի 22-ին նշանակվել է Եվրոպայի Խորհրդում ՀՀ մշտական ներկայացուցիչ: