Երեւան: Մեդիամաքս: Սեպտեմբերի 30-ի ժամը 12։00-ի դրությամբ Արցախից Հայաստան տեղափոխված բռնի տեղահանված անձանց թիվը հասել է 100 417-ի, հայտնել է ՀՀ վարչապետի մամուլի քարտուղար Նազելի Բաղդասարյանը:

Նրա խոսքով, հաշվառվել է 81 139 անձ, նրանցից 32 200-ն օգտվել են պետության կողմից տրամադրված կեցավայրից:

Ըստ մարզերի արցախցիները տեղաբաշխվել են հետեւյալ կերպ՝

Արագածոտնի մարզում ժամանակավոր կացարան է ստացել 1852 մարդ,

Արարատում` 7640,

Արմավիրում` 3009,

Գեղարքունիքում` 2862,

Լոռիում` 1581,

Կոտայքում` 8289,

Շիրակում՝ 1317,

Սյունիքում` 2244,

Վայոց Ձորում` 1700

Տավուշում` 1706։

Հայաստանի բուժհաստատություններում բուժում է ստանում 361 արցախցիներ: Ըստ ՀՀ առողջապահության նախարար Անահիտ Ավանեսյանի, նրանցից 221-ը պայթյունի հետևանքով վնասվածքներ ստացած անձինք են, 114-ը` ռազմական ագրեսիայի հետևանքով վիրավորում ստացածները: Գրանցվել է մահվան 14 դեպք:

Նախարարի խոսքով` շատ պացիենտների վիճակը գնահատվում է ծանր ու ծայրահեղ ծանր, բժիշկները պայքարում են նրանց կյանքի համար: «Վերակենդանացման բաժանմունքներում գտնում է 10 երեխա, երկուսի վիճակը ծայրահեղ ծանր է, մյուսներինը` կայուն, մեկ երեխայի մոտ արդեն կա դրական դինամիկա»,- նշել է նա: