Երեւան: Մեդիամաքս: Ռուսաստանի Անվտանգության խորհրդի քարտուղարի տեղակալ Ռաշիդ Նուրգալիեւը հրապարակել է որոշ տարրեր ԼՂ հակամարտության փուլային կարգավորման ռուսաստանյան առաջարկներից, որոնք ստացել են «Լավրովի պլան» ոչ պաշտոնական անվանումը:
«Առաջարկների էությունը խելամիտ փոխզիջումն էր, որը ենթադրում էր միջազգային խաղաղապահների աջակցությամբ տարածքների աստիճանական վերադարձ եւ ուժային սցենարի իրագործումից հրաժարվելու անհրաժեշտություն: 2016 թվականին ՌԴ ԱԳՆ-ն ներկայացրեց փուլային կարգավորման հայեցակարգը: Փաստաթղթի վերջին խմբագրված տարբերակը կողմերին միջնորդների կողմից փոխանցվել էր 2019 թվականի հունիսին: Փուլային տարբերակը նախատեսում էր Մադրիդի եւ Կազանի փաստաթղթերում ամրագրված սկզբունքների ժառանգականություն:
Հիմնական քայլերը նախատեսում էին առաջին փուլում Ադրբեջանին հինգ գրավյալ շրջանների վերադարձ՝ միջազգային խաղաղապահ ուժերի տեղակայումից հետո: Ընդ որում, նախատեսվում էր Լեռնային Ղարաբաղին օժտել իշխանության մարմիններ եւ ինքնապաշտպանության ուժեր ձեւավորելու իրավունքներով: Վերացվում էր Ղարաբաղի շրջափակումը Ադրբեջանի կողմից եւ վերականգնվում էին առեւտրա-տնտեսական հարաբերությունները», - ասել է Նուրգալիեւը «Ռոսիյսկայա գազետայի» հետ հարցազրույցում:
«Երկրորդ փուլում նախատեսվում էր իրականացնել երկու շրջանների վերադարձը՝ Լեռնային Ղարաբաղի կարգավիճակը սահմանելու համակցմամբ՝ միջազգային նորմերին համապատասխանող հանրաքվեի անցկացման միջոցով: Նախատեսվում էր, որ կողմերի համաձայնությամբ Լաչինի շրջանում կթողնվի միջանցք՝ Լեռնային Ղարաբաղի եւ Հայաստանի տրանսպորտային հաղորդակցության համար: Այս առաջարկները բանակցային գործընթացի կենտրոնական թեման էին: Իլհամ Ալիեւի եւ Նիկոլ Փաշինյանի ուղիղ երկխոսությունը չէր դադարում ընդհուպ մինչեւ 2020
թվականը, սակայն, ցավոք, կողմերի լիակատար համաձայնության հասնել չհաջողվեց», - ասել է Ռուսաստանի Անվտանգության խորհրդի քարտուղարի տեղակալը:
Մեդիամաքսը նշում է, որ Նուրգալիեւի վերջին պնդումը հակասում է այն մեկնաբանությանը, որով հունվարի 13-ին հանդես էր եկել ԵԱՀԿ Մինսկի խմբի ռուսաստանցի համանախագահ Իգոր Պոպովը: Խոսելով ռուսական առաջարկների մասին, նա մասնավորապես, ասել էր.
«Ոչ հայկական, ոչ էլ ադրբեջանական կողմը չեն մերժել սույն առաջարկները, չնայած լիակատար համաձայնության հասնել չէր հաջողվում: Բայց կարեւորն այն էր, որ բանակցություններն ընթանում էին կանոնավոր կերպով՝ ընդհուպ մինչեւ 2018 թվականը, երբ Երեւանն առաջ քաշեց նոր մոտեցումներ»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: