Երեւան: Մեդիամաքս: ՀՀ նախագահ Սերժ Սարգսյանը Բեռլինում ասել է, որ Ռուսաստանը երբեւէ չի եղել Հայաստանի հովանավորը:
«Ես երբեւէ չեմ ասել, որ Ռուսաստանը մեր հովանավորն է, որ որեւէ երկիր եղել կամ կարող է լինել մեր հովանավորը: Եվ Ռուսաստանը երբեւէ Հայաստանի համար չի խաղացել այնպիսի դեր, ինչպիսին Թուրքիան խաղում է Ադրբեջանի համար»,- Deutsche Welle-ին տված հարցազրույցում ասել է ՀՀ նախագահը:
«Ռուսաստանը մեր ռազմավարական դաշնակիցն է, բայց դրա հետ մեկտեղ մենք միշտ բաց կերպով ասում ենք, որ դեմ ենք ռուսական զենքի վաճառքին Ադրբեջանին», - նշել է նախագահը:
Սերժ Սարգսյանը նշել է, որ Լեռնային Ղարաբաղում կրակի դադարեցումն անսպասելի չէր:
«Ադրբեջանը մեծ կորուստներ է կրել: Բացի այս, Ռուսաստանի գլխավոր շտաբի պետը զանգահարել է հայկական ԶՈՒ գլխավոր շտաբի պետին եւ տեղեկացրել, որ ադրբեջանցիները համաձայն են Մոսկվայում հանդիպել հայկական կողմի հետ այս առիթով: Եղել է նաեւ միջազգային հանրության աջակցությունը», - ասել է ՀՀ նախագահը:
Սերժ Սարգսյանը նկատել է, որ հայկական կողմն արել է հնարավոր ամեն ինչ՝ հերթական արյունահեղությունը կանխելու համար:
«Մենք ահազանգում էինք համապատասխան կառույցներին այն մասին, թե ինչի կհանգեցնի սա, թե ինչ զարգացումներ կլինեն: Մենք առաջարկում էինք ստեղծել շփման գծի ամբողջ երկայնքով միջադեպերի հետաքննության մեխանիզմ, որպեսզի հստակ արձանագրվի, թե ով է բախումների նախաձեռնողը», - նշել է ՀՀ առաջնորդը:
Նա ներկայացրել է այն պատճառները, թե ինչու մինչեւ հիմա Հայաստանը չի ճանաչել Լեռնային Ղարաբաղի անկախությունը՝ նշելով, որ հայկական կողմը դեռեւս չի գնում այդ քայլին, որպեսզի էլ ավելի չբարդացնի իրավիճակը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: