Երեւան: Մեդիամաքս: Սեպտեմբերի 28-ին ԼՂՀ նախագահ Բակո Սահակյանը «Արցախի հերոս» բարձրագույն կոչմանն արժանացած Արցախի թեմի առաջնորդ Պարգեւ արքեպիսկոպոս Մարտիրոսյանին է հանձնել «Ոսկե արծիվ» շքանշանը:
Պարգեւատրումը կայացել է Գանձասարի վանական համալիրում՝ Արցախի թեմի վերաբացման 25-րդ տարեդարձին նվիրված հանդիսավոր միջոցառման ընթացքում:
Բակո Սահակյանը կարեւորել է եկեղեցու դերակատարությունը հայ ժողովրդի եւ Արցախի կյանքում՝ ընդգծելով, որ առանց մայր եկեղեցու անհնարին կլիներ գոյատեւել, պահպանել մեր ազգային ինքնությունն ու ավանդույթները, հասնել հաղթանակների, հաղորդել է ԼՂՀ նախագահի մամուլի ծառայությունը:
Պարգեւ արքեպիսկոպոս Մարտիրոսյանին Արցախի նախագահը բնութագրել է որպես «ականավոր եկեղեցական եւ հասարակական գործչի, ով հանդիսանում է Արցախը խորհրդանշող կերպարներից մեկը եւ արժանիորեն շարունակում է պատմական Գանձասարի մեծ առաջնորդների հերոսական գործը»:
