Երեւան: Մեդիամաքս: Ռուսաստանի արտաքին գործերի նախարար Սերգեյ Լավրովը հայտարարել է, որ «պաշտոնական Երեւանը, ենթարկվելով Արեւմուտքի հորդորներին, փորձում է վերափոխել իր արտաքին քաղաքական գիծը»։
«Հայաստանը Մոսկվայի հետ ժամանակի փորձությունն անցած դաշինքը փոխում է ոչ թե Արեւմուտքի կոնկրետ օգնության, այլ անորոշ խոստումների հետ։ Ռազմավարական շրջադարձի ուղղությունն արդարացնելու համար նրանք փորձում են Ռուսաստանին մեղադրել բոլոր անախորժությունների, այդ թվում՝ Ղարաբաղի կորստի համար։ Հայաստանը եղել եւ մնում է մեր ռազմավարական գործընկերը Հարավային Կովկասում։ Մենք համոզված ենք, որ բոլոր դժվարությունները ժամանակավոր են եւ կհաղթահարվեն, եթե լինի քաղաքական կամք», - ասել է Լավրովը ՏԱՍՍ-ին տված հարցազրույցում։
«Հայաստանն այժմ կանգնած է մի շարք մարտահրավերների առաջ։ Դրանք հնարավոր չի լինի տեղայնացնել արեւմտյան խաղացողների օգնությամբ։ ԱՄՆ-ն եւ ԵՄ-ն, ի տարբերություն Ռուսաստանի, չեն ձգտում խաղաղություն եւ կայունություն հաստատել հանրապետությունում եւ ընդհանուր առմամբ Հարավային Կովկասում։ Նրանց խնդիրն է հեռացնել Մոսկվային եւ տարածաշրջանային մյուս խաղացողներին եւ ստեղծել լարվածության նոր օջախ: Այս բարդ իրավիճակից ելքն ակնհայտ է՝ կյանքի կոչել ամենաբարձր մակարդակով ձեռք բերված եռակողմ պայմանավորվածությունները Երեւանի, Բաքվի եւ Մոսկվայի։
Հայաստանի տարածքում 102-րդ ռուսական ռազմակայանի տեղակայման նպատակահարմարության վերաբերյալ քննարկումները վնասակար ենք համարում։ Դրա տեղակայման մասին պայմանագիրը կնքվել է 1995 թվականի մարտի 16-ին՝ հիմնվելով առաջին հերթին ազգային շահերի եւ Հարավային Կովկասում կայունության ամրապնդման մեր պետությունների ընդհանուր նպատակի վրա։ Այսօր մեր զինվորականները կարեւոր գործոն են այս տարածաշրջանում խաղաղության ապահովման գործում։
Վերջին շրջանում Երեւանը զարգացնում է համագործակցությունը ՆԱՏՕ-ի եւ նրա առանձին անդամ երկրների հետ։ Այս տարի Հայաստանը դաշինքի հետ մի քանի տասնյակ միջոցառումների է մասնակցել։ Նա շարունակում է արդիականացնել իր զինված ուժերը ՆԱՏՕ-ի չափանիշներին համապատասխան, հանրապետության զինվորականները վերապատրաստում են անցնում Հյուսիսատլանտյան դաշինքի մի շարք պետություններում։ Դա չի կարող չառաջացնել մեր անհանգստությունը։ Մենք բազմիցս հրավիրել ենք մեր հայ գործընկերների ուշադրությունը, որ ՆԱՏՕ-ի իրական նպատակը տարածաշրջանում իր դիրքերն ամրապնդելն է։
Հուսով եմ, որ Երեւանը գիտակցում է, որ ՆԱՏՕ-ի հետ փոխգործակցության խորացումը հանգեցնում է ինքնիշխանության կորստի ազգային պաշտպանության եւ անվտանգության ոլորտներում»,- ասել է Ռուսաստանի ԱԳՆ ղեկավարը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: