Երեւան: Մեդիամաքս: ՀՀ գլխավոր դատախազի խորհրդական Քրիստինե Մելքոնյանն այսօր Մեդիամաքս-ին հաստատել է տեղեկությունն այն մասին, որ փաստաբան Ամալ Ալամուդին Քլունին կպաշտպանի Հայաստանի շահերը Մարդու իրավունքների եվրոպական դատարանում քննվող «Փերինչեքն ընդդեմ Շվեյցարիայի» գործի շրջանակներում:

Ամալ Ալամուդինը ամերիկացի հայտնի դերասան Ջորջ Քլունիի կինն է:

Քրիստինե Մելքոնյանը Մեդիամաքս-ին հայտնել է, որ Ամալ Ալամուդինն ի թիվս այլ փաստաբանների ընդգրկվել է մասնագետների այն խմբի կազմում, որը ներկայացնելու է ՀՀ շահերը ՄԻԵԴ-ում: Խմբում ընդգրկված է նաեւ հայտնի փաստաբան Ջեֆրի Ռոբերթսոնը, որը գիրք է հեղինակել Հայոց Ցեղասպանության մասին:

Ամալ Ալամուդինը մասնագիտացած է մարդու իրավունքների, միջազգային քրեական իրավունքի, արտահանձման հարցերում: Նրա փաստաբանական ծառայություններից օգտվել են WikiLeaks-ի հիմնադիր Ջուլիան Ասանժը, Ուկրաինայի նախկին վարչապետ Յուլիա Տիմոշենկոն:  

Այս տարվա սեպտեմբերին ՄԻԵԴ-ը հաստատեց Հայաստանի Հանրապետության՝ երրորդ կողմ «Դուղու Փերինչեքն ընդդեմ Շվեյցարիայի» գործով մասնակցությունը:

2007թ. մարտին թուրք ազգայնական Դողու Փերինչեքը դարձավ առաջին մարդը, ով Շվեյցարիայում դատապարտվեց Ցեղասպանության մերժման համար: Նա հայերի ցեղասպանությունն անվանում էր «միջազգային սուտ», ինչի համար «Շվեյցարիա-Հայաստան» ասոցիացիան նրան դատի տվեց ռասայական խտրականության հոդվածով:

«Փերինչեքն ընդդեմ Շվեյցարիա» գործը քննվում է շուրջ 9 տարի:

Փերինչեքի գործով որպես երրորդ կողմ ներգրավվելու խնդրանքով, Մարդու իրավունքների եվրոպական դատարանում ՀՀ կառավարության լիազոր ներկայացուցիչ, ՀՀ գլխավոր դատախազ Գեւորգ Կոստանյանը ՄԻԵԴ էր դիմել այս տարվա օգոստոսին: 

Նիստը նախատեսված է 2015թ հունվարի 28-ին:

Փերինչեքն ընդդեմ Շվեյցարիայի գործով որպես երրորդ կողմ ներգրավված է նաեւ Թուրքիան:

Ս.թ. մարտին Մեդիամաքս-ը հանգամանորեն անդրադարձել էր «Փերինչեք v. Շվեյցարիա» գործին դրա եւ հնարավոր հետեւանքներին Հայաստանի համար: Այդ հոդվածը կարող եք կարդալ այս հղումով: