Երեւան: Մեդիամաքս: Արմենիա հեռուստաընկերության պատվերով Gallup International Association ընկերության անցկացրած նախընտրական հարցման տվյալներով առաջատար դիրքերում են Հայաստանի Հանրապետական եւ «Բարգավաճ Հայաստան» կուսակցությունները:

Նախընտրական հարցումն անցկացվել է ապրիլի 19-ից 23-ն ընկած ժամանակահատվածում` ՀՀ ողջ տարածքում, 1080 ընտրողների շրջանում:

Gallup International Association ընկերության ներկայացուցչության տնօրեն Արամ Նավասարդյանը նշել է, որ ընտրություններին պատրաստվում է մասնակցել հարցվածների 76%-ը, «հավանաբար» կմասնակցի 16%-ը, չի մասնակցի 6%-ը, իսկ 5%-ը դեռ չի կողմնորոշվել:

«Եթե ընտրություններն անցկացվեին այս կիրակի, ո՞ր կուսակցությանը կընտրեիք» հարցին, ընտրողների 27,4%-ը նշել է ՀՀԿ-ին, 20,9%-ը` ԲՀԿ-ին, 8,5%-ը` ՀԱԿ-ին, 4,4%-ը` Ժառանգությանը, 4,2%-ը` ՕԵԿ-ին եւ 3,7%-ը` ՀՅԴ-ին: Հարցին հրաժարվել է պատասխանել հարցվածների 11,8%-ը եւ դժվարացել է պատասխանել 9.4%-ը:

Հարցվածների 42%-ը կարծում է, որ ընտրություններից հետո երկրում ոչինչ չի փոխվի, դրական փոփոխություններ է ակնկալում 8%-ը, իսկ 33%-ը կարծում է, որ կլինեն որոշակի փոփոխություններ: