Բրիտանական Յորքի համալսարանի որակյալ կրթություն՝ առավել մատչելի արժեքով, իսկ որպես լրացուցիչ առավելություն՝ հունական ջերմ ընդունելություն Սալոնիկ քաղաքում ու շրջանավարտներ, որոնք արդեն «գրում են» իրենց հաջողության պատմությունները։  

Սա այն առաջարկն է, որ Յորքի համալսարանի եվրոպական կամպուսը՝ հունական Սալոնիկում գտնվող City College-ն, անում է հայաստանյան դիմորդներին։

Այս պահին ընթանում է համալսարանի բակալավրիատի եւ մագիստրատուրայի ծրագրերի համար փաստաթղթերի ընդունման «early bird» փուլը։ Այն ենթադրում է որոշակի զեղչեր եւ տեւելու է մինչեւ մարտի 31-ը։ Փաստաթղթերի ընդունման մյուս փուլերը կշարունակվեն նաեւ նշված ամսաթվից հետո։  

Լուսանկարը` Մեդիամաքս

Երեւանում անցկացվող Յորքի համալսարանի եվրոպական կամպուսի միջոցառումների շաբաթվա շրջանակում դիմորդներին ու նրանց ծնողներին ներկայացվել են բակալավրի եւ մագիստրատուրայի ծրագրերը, իսկ City College-ի ուսանողների հավաքագրման գծով տնօրեն Գրեգորի Դիկեոսը խոսել է կրթության համար ճիշտ համալսարան ընտրելու չափանիշների մասին։

Առանձնացրել ենք նրա ելույթի հետաքրքիր դրվագներն ու զրուցել Յորքի համալսարանի եվրոպական կամպուսի հայաստանյան եւ վրաստանյան ծրագրերի տնօրեն Լիլիթ Շահզադեյանի հետ։

Կրթական ծրագրերի հանդեպ հետաքրքրության աճն ու աշխատաշուկայում պահանջված շրջանավարտները

Լիլիթ Շահզադեյան

Յորքի համալսարանի եվրոպական կամպուս City College-ի բակալավրի եւ մագիստրատուրայի ծրագրերով հետաքրքրված հայ ուսանողների թիվը տարեցտարի աճում է։ Սա պայմանավորված է մի քանի հանգամանքով։

Նախ՝ արդեն ունենք այս ծրագրերով կրթություն ստացած եւ Հայաստան վերադարձած շրջանավարտներ, որոնց հաջողության պատմությունները ոգեւորում են դիմորդներին։

Հետաքրքրված երիտասարդներն ու նրանց ծնողները տեսնում են՝ ինչ որակի կրթություն է տալիս այս համալսարանն ու առավել շատ տեղեկատվություն ստանում քաղաքի մասին՝ ուր պատրաստվում են ուղարկել սեփական երեխաներին։

Լիլիթ Շահզադեյանը

Լուսանկարը` Մեդիամաքս

Շրջանավարտները պատմում են՝ որքան անվտանգ եւ ջերմ է Սալոնիկը, ինչքան լավ են այնտեղ դիմավորում հայ ուսանողներին եւ ինչ դասախոսներ են դասավանդում City College-ում։ Մեր շրջանավարտները պահանջված են աշխատաշուկայում, քանի որ Յորքի համալսարանի եվրոպական կամպուս City College-ում ստանում են նույն որակի կրթություն, ինչ կստանային Բրիտանիայում, բայց՝ անհամեմատ մատչելի արժեքով։

Ծրագրերի հանդեպ հետաքրքրության աճին նպաստող մյուս կարեւոր գործոնը կրթաթոշակների տրամադրման ծրագիրն է։ Բացի զեղչային ճկուն համակարգից, արդեն երրորդ տարին իրականացնում ենք մրցույթ՝ տրամադրելով թե՛ ամբողջական, թե՛ մասնակի կրթաթոշակներ։ Սա պարզ եւ բաց ձեւաչափ է, որի արդյունքում կրթաթոշակներ են ստանում լավագույն դիմորդները։ Չնայած՝ մեր դեպքում բոլորն են լավագույն (ժպտում է – հեղ.)։

Լուսանկարը` Մեդիամաքս

Պետք է ասեմ, որ այս տարի կրթաթոշակների մրցույթում ներգրավված էին այնքան ուժեղ եւ իրար ոչնչով չզիջող դիմորդներ, որ հատուկ կոմիտեն ընտրությունը կատարել է մեծ դժվարությամբ։

«Գնացեք ձեր երազանքների հետեւից, բայց հիշեք՝ իրական կյանքը ջունգլի է»

Գրեգորի Դիկեոս, Յորքի համալսարանի եվրոպական կամպուս City College-ի ուսանողների հավաքագրման գծով տնօրեն

Իմ աշխատանքն է ճամփորդել աշխարհով եւ մեր համալսարան «բերել» լավագույն դիմորդներին։ Պետք է խոստովանեմ՝ Հայաստանն իմ սիրելի վայրերից է։ Այստեղ եղել եմ մոտ 30 անգամ ու ամեն այցս տուն վերադառնալու զգացողություն է առաջացնում։

Միեւնույն ժամանակ, այսօր իմ դերը ձեզ միայն «Յո՛րք, Յո՛րք, էլի ու էլի Յորք» ասելը չէ։ Ես Երեւանում եմ, որպեսզի լինեմ խորհրդատու, ավագ ընկեր ու օգնեմ պատկերացնել՝ ինչպես ընտրել համալսարան, ինչին ուշադրություն դարձնել։ Չէ՞ որ շատ երիտասարդներ այսօր կանգնած են խաչմերուկում՝ մտածելով, թե որ ուղղությամբ են քայլելու։

Գրեգորի Դիկեոսը

Լուսանկարը` Մեդիամաքս

Նրանք չեն կողմնորոշվում՝ մասնագիտություն եւ համալսարան ընտրելիս հիմնվել սեփական հետաքրքրությունների, թե՝ իրական կյանքի պահանջների վրա։ Այստեղ կարող էի կիսվել սեփական փորձով՝ ինչպես ընդունվելուց ընդամենը երեք ամիս անց թողեցի բժշկական համալսարանը, բայց... նախընտրում եմ մի երիտասարդ աղջկա պատմություն ներկայացնել։  

Դիմորդների հետ նման հանդիպման ժամանակ հարցրեցի նրան՝ ի՞նչ մասնագիտություն է ուզում ստանալ։ Նա հպարտությամբ պատասխանեց՝ «ուզում եմ ուսումնասիրել արվեստի պատմությունը»։

«Վաու՜։ Անկեղծ եմ ասում՝ շատ հետաքրքիր է», - արձագանքեցի՝ տալով նրան երկրորդ հարցս.

«Իսկ ի՞նչ աշխատանք ես դու կատարելու, երբ ավարտես համալսարանն ու դիպլոմ ստանաս»։

«Հմմ, ես այդ մասին դեռ չեմ մտածել», - պատասխանեց երիտասարդ աղջիկը։

Ահա այստեղ է, որ կարեւոր դեր ունի լավ ուսուցիչն ու մենտորը։ Նա պետք է քաջալերի երիտասարդներին՝ գնալ երազանքների հետեւից, իրականացնել դրանք, բայց նաեւ հիշել՝ իրական աշխարհը ջունգլի է։

Լուսանկարը` Մեդիամաքս

Երբ կրթություն ստանաք, դուք աշխատանք եք փնտրելու, ցանկանալու եք լավ վարձատրվել ու կառուցել հանդարտ, ապահով կյանք։ Տղանե՛ր, սխալ չհասկանաք, բայց այս պահին ավելի շատ աղջիկներին եմ դիմում։ Հատկապես դուք, աղջիկնե՛ր, պետք է լինեք ուժեղ, ստանաք լավ կրթություն, որովհետեւ ապագա մայրիկներ եք։ Եթե մի օր ձեր կողքի երիտասարդը սկսի իրեն հիմարի պես պահել, պետք է վստահ ասեք նրան՝ «հաջողություն, վերադարձիր մայրիկիդ մոտ» ու պատրաստ լինեք ինքնուրույն մեծացնել սեփական երեխաներին։ Հիմա ձեր մասով՝ տղանե՛ր, դուք եւս լուրջ պատասխանատվություն ունեք։ Որակյալ կրթությունը անկախ լինելու, սեփական ընտանիքն ապահովելու հիմքն է։ Հիշեք՝ այլեւս չեք կարող հույսը դնել մայրիկ-հայրիկի վրա։ Այնպես որ, ճիշտ ընտրություն կատարեք։

«Մի՛ ընտրեք առաջին պատահած համալսարանը, միայն նրա համար, որ այն արտասահմանում է»

Հաշվի առեք կարեւոր նրբություններ, երբ ընտրում եք ձեր ապագա համալսարանը։ Մի՛ ընտրեք այն միայն արտասահմանում գտնվելու համար։ Էլի մի պատմություն հիշեցի, ինչպես նկատեցիք՝ սիրում եմ ասելիքս տարբեր պատմությունների միջոցով ներկայացնել (ժպտում է – հեղ.)։

Լուսանկարը` Մեդիամաքս

Մի անգամ մասնագիտական կողմնորոշման սեմինար էի վարում 500-ից ավելի երիտասարդի համար։ Դրա ավարտին ինձ մոտեցավ մի աղջիկ եւ ասաց՝ «ձեր խորհուրդները շատ հետաքրքիր էին, շնորհակալ եմ, բայց ես արդեն ընտրել եմ իմ ապագա համալսարանը։ Մեկնելու եմ Դանիա՝ սովորելու տեղի համալսարաններից մեկում: Նրանք ինձ նույնիսկ կրթաթոշակ են առաջարկել»։ Բուհի իրական անվանումը չնշելու համար ես այն պայմանական ABC կանվանեմ։

Գրեգորի Դիկեոսը

Լուսանկարը` Մեդիամաքս

Նախ զարմացա, որովհետեւ երկար տարիներ լինելով կրթական ոլորտում՝ այս համալսարանի անունն անգամ չէի լսել։ Դեպքն ինձ հետաքրքրեց, ես գնացի տուն ու սկսեցի փնտրել։ Պարզվեց՝ սա մի փոքրիկ համալսարան է Դանիայի ծայրամասում եւ այն իսկապես բազմաթիվ կրթաթոշակներ է առաջարկում, բայց մի հետաքրքիր պատճառով։ Ինքս ինձ համար բացահայտեցի՝ Դանիայում կա օրենք, ըստ որի՝ որքան շատ ուսանողներ է կարողանում ներգրավվել բուհը, այնքան ավելի մեծ ֆինանսավորում է ստանում կառավարությունից։ Միեւնույն ժամանակ, փոքրիկ ուսումնասիրության արդյունքում ակնհայտ էր՝ այս համալսարանի համբավն այնքան էլ լավը չէ։

Լուսանկարը` Մեդիամաքս

Մեկ տարի անց նորից հանդիպեցի այդ աղջկան։ Սեմինարիս վերջում, ինչպես նախորդ անգամ մոտեցավ ինձ՝ հիշեցնելով, որ դանիական ABC համալսարանում կրթաթոշակ ստացած դիմորդն է։ Հիշեցի նրան, քանի որ այս դեպքն ինձ տպավորել էր։

Աղջիկը պատմեց, որ թողել է համալսարանը՝ չսպասելով անգամ առաջին կիսամյակի ավարտին։ Առաջին պատճառը կրթության ցածր որակն էր, մյուսը՝ Դանիայում խենթանալու աստիճանի թանկ կյանքը, որն աղջիկը հաշվի չէր առել ապագա համալսարանն ընտրելիս։

Յորքի համալսարանի եվրոպական կամպուսի կրթական ծրագրերի վերաբերյալ լրացուցիչ հարցերի համար կարող եք զանգահարել համալսարանի պաշտոնական գրասենյակ՝ 093 909 349 հեռախոսահամարով:

Յանա Շախրամանյան

Լուսանկարները՝ Էմին Արիստակեսյանի