Երեւան: Մեդիամաքս: Հայաստանի պաշտպանության նախարարությունը հայտնում է, որ Սիրիայի մի շարք շրջաններում ընթացող ռազմական գործողություններն անհնար են դարձրել Հալեպի տարածաշրջանում առաքելություն իրականացնող Հայաստանի Հանրապետության հումանիտար ականազերծման և բուժաշխատողների մասնագիտական խմբի գործունեությունը։
«Հաշվի առնելով ստեղծված իրավիճակը՝ որոշում է կայացվել ժամանակավորապես կասեցնել խմբի գործունեությունը Հալեպում։ Նոյեմբերի 29-ի ուշ երեկոյան ՀՀ հումանիտար ականազերծման և բուժաշխատողների մասնագիտական խմբի ողջ անձնակազմը ՀՀ ՊՆ ռազմատրանսպորտային ինքնաթիռով վերադարձել է Հայաստան», - ասված է հաղորդագրության մեջ:
Հայաստանի հումանիտար ականազերծման և բուժաշխատողների խումբը Հալեպում աշխատում էր 2019 թվականի փետրվարից:
