Երեւան: Մեդիամաքս: Այսօր առավոտյան՝ ժամը 9:00-ի սահմաններում, ադրբեջանական բանակի կողմից Տավուշի մարզի Բերդի տարածաշրջանի ուղղությամբ իրականացված հարձակումների հետեւանքով զոհվել են լեյտենանտ Կարեն Գալստյանը եւ շարքային Արտակ Սարգսյանը, կան վիրավորներ:

«Հայկական բանակի համապատասխան ստորաբաժանումների կողմից ժամանակին հայտնաբերվելով՝ մարտ է սկսվել, որը տեւել է շուրջ կես ժամ: Հակառակորդը կորուստներ կրելով եւ մարտական խնդիրը չկատարելով՝ հետ է շպրտվել»,- տեղեկացրել է ՀՀ պաշտպանության նախարարության մամուլի խոսնակ Արծրուն Հովհաննիսյանը՝ հավելելով, որ այս գիշեր հրադադարի ռեժիմը խախտվել է 300 անգամ:

ՊՆ խոսնակն ընդգծել է, որ լարվածության ամբողջ պատասխանատվությունն ու հետեւանքները մնում են Ադրբեջանի ռազմաքաղաքական ղեկավարության խղճին:

Այս գիշեր հակառակորդը դիվերսիոն փորձեր է ձեռնարկել նաեւ շփման գծի ուղղությամբ: ԼՂՀ Պաշտպանության բանակի նախնական տվյալներով՝ ադրբեջանական կողմն ունի 3 զոհ:

Վերջին օրերին հայկական բանակը մի քանի զոհ է տվել: Տավուշում զոհվել էր պայմանագրային զինծառայող Արման Ուդումյանը, շփման գծում իրականացված դիվերսիայի հետեւանքով՝ 33-ամյա զինծառայող Նահապետ Ասատրյանը, 20-ամյա Սուրեն Փիլոսյանը: