1989 թվականի ամռանը Լոնդոնի Metropolis Studios ստուդիայում ձայնագրվեց Deep Purple խմբի Smoke on the water հիթի «աստղային» տարբերակը՝ 1988 թվականի Սպիտակի երկրաշարժից տուժած Հայաստանին օգնելու նպատակով: Rock Aid Armenia-ի 30-ամյակին նվիրված հատուկ նախագիծը բացահայտում է ծրագրի մանրամասները: 

Նախագիծն իրականացվում է Հայաստանում Բրիտանական Խորհրդի գրասենյակի աջակցությամբ:

Համացանցում կարելի է հրապարակումներ գտնել այն մասին, որ Rock Aid Armenia-ի աստղային կազմը 1989 թվականին իբր նախատեսում էր համերգ տալ Լոնդոնի հանրահայտ Wembley մարզադաշտում, սակայն ծրագիրը խափանվել է:

Իրականում, ինչպես Մեդիամաքսին պատմել է Rock Aid Armenia-ի հիմնադիր Ջոն Դին, Wembley-ում համերգ տալու ծրագիր երբեւէ չի եղել:

«Այդ լուրերը սկսեցին տարածվել, երբ 2005 թվականին ինչ-որ մեկը Wembley-ում, իբրեւ թե կայանալիք, համերգի կեղծ պաստառներ պատրաստեց ու սկսեց վաճառել դրանք eBay-ում: Հերիք չէ, որ կեղծ էին, նաեւ անորակ էին: Այսպիսով, եթե տեսնեք այդ պաստառները, պետք չէ դրանք գնել», - ասում է Ջոն Դին:

Կեղծ պաստառը

Լուրեր կային նաեւ այն մասին, որ Ստաս Նամինը մտադիր էր Rock Aid Armenia-ի համերգ կազմակերպել Մոսկվայում: Ջոն Դին պատմում է, որ երբ 1990 թվականին Իէն Գիլանի հետ այցելեցին ԽՍՀՄ, ինքը հանդիպել էր Ստաս Նամինի հետ, սակայն համերգի մասին չէին խոսել:

«Ես Ստաս Նամինին հանդիպեցի Մոսկվայում: Նա շատ հետաքրքիր անձնավորություն է: 1989 թվականին Մոսկվայում ամերիկացիների հետ համատեղ մեծ համերգ էր կազմակերպել՝ ընդդեմ թմրադեղերի:

Ջոն Դին եւ Ստաս Նամինը

Ստասը հետաքրքրվեց, թե արդյո՞ք կարող ենք Rock Aid Armenia-ի ալբոմը թողարկել ԽՍՀՄ-ում՝ տեղական լեյբլով: Ի վերջո, մենք դա չարեցինք, քանի որ համոզված չէինք, որ կկարողանանք այդկերպ միջոցներ հավաքագրել Հայաստանի մարդկանց համար: Սակայն Ստասը շատ պատրաստակամ էր եւ մեծ աջակցություն ցուցաբերեց մեզ: Նա շատ ճիշտ խորհուրդներ տվեց, թե ինչպես կարելի է օգնել մարդկանց Հայաստանում»,- հիշում է Ջոնը:

Կարդացեք նաեւ. 

«Կոմսոմոլկայի» 1989-ի անդրադարձը Rock Aid Armenia-ին

Դէվիդ Գիլմորն օգնեց ձեւավորել Rock Aid Armenia-ի աստղաբույլը

Ինչպես Ռոջեր Թեյլորը դարձավ Rock Aid Armenia-ի թմբկահարը

***

2019 թվականի հունիսի 5-ին Երեւանում տեղի ունեցավ հանդիսավոր երեկո` նվիրված Rock Aid Armenia-ի 30-ամյակին: Երեկոյին մասնակցելու նպատակով Երեւան էին ժամանել ռոքի լեգենդները՝ Deep Purple-ի վոկալիստ Իէն Գիլանը եւ Black Sabbath-ի կիթառահար Թոնի Այոմին, ինչպես նաեւ Rock Aid Armenia նախագծի հեղինակ Ջոն Դին: Այցի եւ տոնակատարության կազմակերպիչներն էին Մեդիամաքս մեդիա ընկերությունը եւ DoSomething կազմակերպությունը (Ավստրալիա):

Rock Aid Armenia ծրագրի 30-ամյակի եւ ռոք աստղերի այցի գլխավոր հովանավորը IDBank-ն էր: Միջոցառման գործընկերը Koor գինին էր: