Առաջին անգամ տեսել եմ Շախտյորի խաղը 2004 թվականին, երբ Չեմպիոնների լիգայի որակավորման փուլում Երևանի Փյունիկը մրցում էր այս թիմի հետ: Իհարկե Շախտյորն այն ժամանակ շատ համեստ մի թիմ էր, սակայն, միևնույնն է, բարձրակարգ ակումբի տպավորություն թողեց: Անցյալ դարի վերջում անգամ աշխարհի 1000 լավագույն ակումբների ցուցակում չհայտնված այդ թիմը կտրուկ աճ գրանցեց 2007 թվականին, և դա ոչ այն պատճառով,որ հայտնվեց Չեմպիոնների լիգայի խմբային փուլում,այլ ցուցադրած բարձր վարպետության ու խաղամակարդակի շնորհիվ:
«Ինչու՞ եմ երկրպագում Շախտյորին»,-հարցնում եք դուք ինձ: «Իսկ ինչպե՞ս չերկրպագեմ»,- կհարցնեմ ես ձեզ: Չէ՞ որ կար մի ժամանակ, երբ հայ ֆուտբոլասերներից ամենալավատեսն անգամ չէր կարող երազել, որ Հայաստանի հավաքականը Չեմպիոնների լիգայում իր մասնակիցը կունենա: Չէ՞ որ կար մի ժամանակ, երբ մենք` հայերս, բանավեճի էինք բռնվում միայն օտարազգի ֆուտբոլիստների`ՉԼ-ում գոլ խփել կամ չխփելու մասին, իսկ այսօր բոլորս խոսում ենք Հենրիխ Մխիթարյանի ցուցադրած խաղի մասին,բոլորս ցանկանում ենք խաղի ժամանակ լսել «Սուսերով պարը»:
2010 թվականին, երբ Հենրիխ Մխիթարյանը միացավ դոնեցկյան ակումբին,աշխարհում սփռված շուրջ 10 միլիոն հայերի սիրտը սկսեց բաբախել Շախտյորի համար. բացառություն չէի նաև ես: Հենրիխ Մխիթարյանը մեր ազգի դրոշակակիրը դարձավ եվրոպական մրցասպարեզներում և իր ցուցադրած փայլուն խաղով, բոլորին ապացուցում է,որ մենք ՈՒԺԵՂ ենք, մենք ՀԶՈՐ ենք: Նա արդեն իսկ իր վրա է սևեռել եվրոպական գրանդ ակումբներից շատերի ուշադրությունը: Ոմանք նրան «ուղարկում են» Յուվենտուս, ոմանք`Արսենալ կամ Անգլիայի պրեմիեր լիգայի որևէ այլ թիմ:
Սակայն մի պահ եկեք հարց տանք ինքներս մեզ. «Իսկ ինչու՞ Մխիթարյանն ընդհանրապես պետք է հեռանա Շախտյորից»: Չէ՞ որ հենց Յուվենտուսը ՉԼ-ի խմբային փուլում, Շախտյորի հետ խաղում մեղմ ասած մեծ դժվարությունների հանդիպեց ու 1-1 հաշվի ժամանակ խաղավերջում հրաշքով փրկվեց 2-րդ գոլից: Չէ՞ որ Շախտյորն այս տարի,ՉԼ-ում հայտնվելով շատ բարդ խմբում,առանց դժվարության ապահովեց հաջորդ փուլի ուղեգիրը և այժմ միայն Շախտյորից է կախված,թե անցյալ տարվա ՉԼ-ի հաղթող թիմը այս տարի կխաղա փլեյ-օֆֆ փուլում,թե ոչ:
Ընդ որում Շախտյորի այս տարվա հաջողությունները ոչ մի դեպքում չի կարելի պատահական համարել, քանի որ թիմը դեռ 2 տարի առաջ, ՉԼ-ում կրկին գերազանց հանդես գալով և հասնելով մինչև քառորդ եզրափակիչ, ապացուցեց,որ կարող է մրցել եվրոպայի ցանկացած թիմի հետ: Իսկ արդեն այսօր Շախտյորը համարվում է աշխարհի 12-րդ ուժեղագույն ակումբը: Եվ այսքանից հետո ես կրկին ու կրկին ուզում եմ հարցնել ձեզ. «Ինչպե՞ս չերկրպագեմ Շախտյորին»:
