Վասիլ Ստուսը ծնվել է 1938 թ-ին: Բանաստեղծությունների եւ հոդվածների հեղինակ է։ Բանաստեղծություններում հաճախ է շոշափում ազատության, հայրենիքի հանդեպ սիրո թեման: Ստուսի քաղաքական գործունեության մեկնարկը 1965 թ-ին է եղել: Ուկրաինական մտավորականության ձերբակալությունների դեմ հանրահավաքի ժամանակ նրա ելույթը պատճառ է դառնում, որպեսզի գրողին հեռացնեն Կիեւի Շեւչենկոյի անվան գրականության ինստիտուտի ասպիրանտուրայից։ Հանրահավաքը կայանում է հայ ռեժիսոր Սերգեյ Փարաջանովի` «Մոռացված նախնիների ստվերները» ֆիլմի առաջին ցուցադրության ժամանակ:

1965 թ-ին Ստուսը փորձում է հրատարակել իր առաջին`«Ջրապտույտ» ժողովածուն, սակայն նրա քաղաքացիական դիրքորոշման պատճառով հրատարակիչները մերժում են: «Ձմեռային ծառեր» ժողովածուն եւս մնում է հրատարակչությունում: Միայն հինգ տարի անց` 1970 թ-ին այն լույս է տեսնում Բելգիայում, ինչից հետո Ստուսը վերջնականապես դառնում է համակարգի հալածյալը:

1972 թ-ին Վասիլ Ստուսը ձերբակալվում է հակախորհրդային քարոզչության մեղադրանքով, 7 տարի անցկացնում Մորդովիայի եւ Մագադանի կալանավայրերում։ 1980 թ-ին երկրորդ անգամ ձերբակալվելուց հետո նրան արգելում են նույնիսկ բանաստեղծությունները տուն ուղարկել: Վասիլ Ստուսը մահացել է 1985թ. «Պերմ-36» հատուկ ճամբարի մենախցում։