Ներկայացնում ենք Looking at the implications of India’s rising profile in the South Caucasus հոդվածի հայերեն թարգմանությունը:

Հնդկաստանը մեծացնում է իր աջակցությունը Հայաստանին՝ լրացուցիչ գործոն ավելացնելով Հարավային Կովկասի արդեն իսկ բարդ անվտանգության հավասարմանը։

Ըստ ռուսական լրատվամիջոցների՝ վերջին հինգ տարվա ընթացքում Հայաստանը կնքել է մոտ 1.5 միլիարդ դոլարի գործարքներ՝ հնդկական զենք ձեռք բերելու համար, այդ թվում՝ զենիթային հրթիռներ, հրետանային համակարգեր, հարվածային անօդաչու թռչող սարքեր եւ զինամթերք։ Նույն ժամանակահատվածում Ռուսաստանի՝ Երեւանի նախկին ռազմավարական դաշնակցի կողմից զենքի վաճառքը գրեթե լիովին դադարել է։ Ֆրանսիան Երեւանի հետ կնքել է մոտ 250 միլիոն դոլարի զենքի պայմանագրեր, եւ աշխարհաքաղաքական առումով Հայաստանը սկսել է թեքվել դեպի Միացյալ Նահանգները եւ Եվրոպական Միությունը։

Ռուսաստանի միջազգային հարաբերությունների խորհրդի վերլուծությունն ընդգծում է, որ Հայաստանի դիրքորոշման փոփոխությունը՝ թե՛ զենք գնելու, թե՛ քաղաքական ներգրավվածության առումով, մտահոգություն է առաջացնում Մոսկվայում։

«Մի քանի տարի առաջ կարելի էր համարձակորեն պնդել, որ Ռուսաստանի համար Հայաստանը ոչ միայն Հարավային Կովկասում հետաքրքրության հատուկ երկիր էր, այլեւ տարածաշրջանում ռուսական ներկայության գլխավոր հենակետը, - նշվում է զեկույցում։ - Այսօր [Ռուսաստանի] ներկայությունն ու ազդեցությունը հարցականի տակ են»։

«Հայաստանը ձգտում է ավելի սերտ կապեր հաստատել տարածաշրջանից դուրս խաղացողների հետ, - հավելում է զեկույցը։ - Սա իր հերթին ավելի է նեղացնում մանեւրելու տարածքը, որը Ռուսաստանը կարող է օգտագործել Հարավային Կովկասում իր դիրքերը վերականգնելու համար»։