Երեւան: Մեդիամաքս: ՀՀ կառավարությունն այսօրվա նիստում հավանություն է տվել Երեւանի ավագանու լիազորությունների ժամկետը կրճատելու եւ արտահերթ ընտրություններ նշանակելու ու անցկացնելու վերաբերյալ որոշման նախագծին։
Ընտրությունների օրը կհայտարարի Կենտրոնական ընտրական հանձնաժողովը՝ որոշման հրապարակումից հետո 30-40-օրյա ժամկետում։
ՀՀ վարչապետ Նիկոլ Փաշինյանն ասել է, որ Երեւանի ընտրությունները պետք է լինեն բացառիկ՝ օրինականության, թափանցիկության եւ արդարության առումով։
«Սա մեր կառավարության օրոք տեղի ունենալիք առաջին այս ծավալի ընտրություններն են, եւ մեզ համար առաջնահերթ խնդիր է դրանց ազատությունը, ժողովրդավարությունը եւ օրինականությունը ապահովելը»,- ասել է վարչապետը։
Նրա խոսքով, այս ընտրություններում ընտրակաշառքի որեւէ դեպք չպետք է գրանցվի, իսկ ընտրակաշառքի փորձ անող որեւէ անձ չպետք է մնա առանց պատասխանատվության։
«ՀՀ քաղաքացիների կամքի վրա որեւէ ապօրինի ազդեցությունը պետք է բացառվի։ Հույս ունեմ՝ որեւէ մեկը չի տրվի իր բախտը փորձելու գայթակղությանը»,-հայտարարել է կառավարության ղեկավարը։
Մեդիամաքսը հիշեցնում է, որ Երեւանի քաղաքապետ Տարոն Մարգարյանը հրաժարական է տվել հուլիսի 9-ին, իսկ հուլիսի 16-ին Երեւանի ավագանին նոր քաղաքապետ չի ընտրել:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: