Հայերեն Վիքիպեդիան հոդվածների քանակով 48-րդն է աշխարհում - Mediamax.am

1752 դիտում

Հայերեն Վիքիպեդիան հոդվածների քանակով 48-րդն է աշխարհում


Հայերեն Վիքիպեդիան հոդվածների քանակով 48-րդն է աշխարհում
Հայերեն Վիքիպեդիան հոդվածների քանակով 48-րդն է աշխարհում

Լուսանկարը` http://bm.img.com.ua


Երեւան: Մեդիամաքս: Հայերեն Վիքիպեդիան համալրել է խոշորագույն Վիքիպեդիաների շարքը եւ ներկայումս հոդվածների քանակով զբաղեցնում է 48-րդ տեղը:

Ինչպես հաղորդում է Մեդիամաքս-ը, այսօր լրագրողների հետ հանդիպմանը «Վիքիմեդիա Հայաստան» հասարակական կազմակերպության նախագահ Սուսաննա Մկրտչյանը, ամփոփելով կազմակերպության 2 տարվա գործունեությունը, ասել է, որ դեռ երկու տարի առաջ Վիքիպեդիան ուներ ընդամենը 16 հազար հայերեն հոդված, իսկ այսօր դրանց թիվը հատել է 100 հազարի սահմանը:

 

«Իր գործունեության կարճ ժամանակահատվածում «Վիքիմեդիա Հայաստանը» իրականացրել է «Վիքին սիրում է հուշարձանները» միջազգային լուսանկարչական մրցույթը Հայաստանում եւ Արցախում, կազմակերպել Վիքի-կոնֆերանս Երեւանում, ծավալել կրթական ծրագրեր հանրակրթական դպրոցներում»,- ասել է Սուսաննա Մկրտչյանը:

 

Կազմակերպության ղեկավարի խոսքերով, գալիք տարում «Վիքիմեդիա Հայաստանը» նախատեսում է վիքի-մշակույթը տարածել հանրապետության բոլոր ավագ դպրոցներում եւ բուհերում:

 

«Շատ կարեւորում ենք հայերենով մասնագիտական նյութերի զարգացումը հայկական համացանցում: Այդ նպատակով հունվարին ծրագրվում է կազմակերպել թեմատիկ խմբեր քիմիայից, ֆիզիկայից, մաթեմատիկայից, կենսաբանությունից, որոնց շնորհիվ հայերեն Վիքիպեդիայում կզարգանան այս ոլորտի հոդվածները»,- ասել է Սուսսաննա Մկչտրյանը:

 

Գիտական թեմաներով խմբերից բացի «Վիքիմեդիա Հայաստանը» համագործակցության պայմանավորվածություն է ձեռք բերել մի խումբ հայագետների հետ, որոնք ցանկանում են հարստացնել հանրագիտարանը հայագիտական նյութերով: 

 

Խոսելով կազմակերպության աջակիցների մասին` Սուսաննա Մկրտչյանը նշել է, որ կազմակերպության առաջին աջակիցներից են եղել բարերար Ռուբեն Վարդանյանը եւ “Քոմեդի Քլաբ Պրոդաքշն” ընկերության հիմնադիր Արթուր Ջանիբեկյանը:

 

Վիքիպեդիան ազատ հանրագիտարան է: Այն կարող է խմբագրել յուրաքանչյուր ոք: Գործնականում այն զարգանում է կամավոր խմբագրումներ անող ընթերցողների շնորհիվ: Վիքիպեդիան «ազատ» է կոչվում նաեւ այն պատճառով, քանի որ նրա բովանդակությունը հասանելի է ազատ արտոնագրով: 

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Մեր ընտրանին