Երեւան: Մեդիամաքս: «Փարկինգ Սիթի Սերվիս» ՓԲԸ տնօրեն Վազգեն Հարությունյանն այսօր ասել է, որ «վճարովի ավտոկայանատեղիներից օգոստոս ամսին օգտվելու համար գումար վճարած վարորդները կարող են դիմել Երեւանի քաղաքապետարան, որտեղ կվերահաշվարկվեն նրանց ծախսերը»:

Անդրադառնալով տուգանքների կիրառմանը` Վազգեն Հարությունյանն ասել է, որ «դրանք իրականացնելու է Երեւանի քաղաքապետարանը, իսկ ՓԲԸ-ն նրանց տրամադրելու է  խախտում կատարած մեքենաների վերաբերյալ տվյալներ»:

Բանախոսի փոխանցմամբ, ներկայումս Երեւանում կա կահավորված վճարովի 8 ավտոկայանատեղի, Կենտրոն համայնքում աշխատանքներն ավարտելուց հետո կանցնեն Երեւանի մյուս վարչական շրջաններին:

Վճարովի ավտոկայանատեղիների կազմակերպումն ու կահավորումն ամբողջ Երեւանում նախատեսվում է իրականացնել մինչ 2014 թվականի վերջը: «Ընդհանուր առմամբ նախատեսվում է 20000 ավտոկայանատեղի, որոնք կահավորված կլինեն 5000 տեսախցիկներով, իսկ մյուս կայանատեղերը կհսկվեն շրջիկ մեքենաների միջոցով: Նշված աշխատանքների իրականացման համար ընկերությունը նախատեսում է ներդնել $ 10 մլն»,- ասել է Վազգեն Հարությունյանը:

Խոսելով շահույթի մասին` նա նշել է, որ «սահմանված գումարը տեղական տուրք է, որը գանձվում է քաղաքապետարանի կողմից»:

«Հավաքված գումարի 70%-ը հանձնվելու է ընկերությանը, որից 16,6%-ը կկազմի ԱԱՀ-ն, կլինեն նաեւ լրացուցիչ հարկեր, որոնք դուրս կգան այդ 70%-ից: Նախատեսվում է մինչեւ 10% շահութաբերություն»,- ասել է Հարությունյանը: