2025թ. հունիսի 12-ին Hard Rock Café Yerevan-ում մեկնարկել է երկրորդ «Apricot Rally»-ն՝ միակ Harley-Davidson թեմատիկ փառատոնը Հայաստանում։

Լուսանկարը` Մեդիամաքս

«Apricot Rally»-ն կազմակերպում է Mount Ararat Chapter-ը՝ Հայաստանի առաջին պաշտոնական Harley Owners Group (H.O.G.) ակումբը։ Փառատոնն այս տարի շուրջ 180 մասնակից ունի ավելի քան 15 մոտոակումբներից, որոնք Երեւանից կմեկնեն Սեւան, ապա՝ Դիլիջան: 

Լուսանկարը` Մեդիամաքս

Փառատոնի հիմնադիր Գրիգորի Հարությունյանի խոսքով՝ գաղափարը ծնվել է ավելի քան հինգ տարի առաջ՝ մի քանի մոտոցիկլիստների նախաձեռնությամբ, որոնք ցանկանում էին Հայաստանում Harley-Davidson-ի շուրջ հիմնված մշակույթ եւ համայնք ձեւավորել։

Գրիգորի Հարությունյանը

Լուսանկարը` Մեդիամաքս

«Սկզբում նախաձեռնությունը շատ ռիսկային էր թվում՝ Հայաստանում մոտոկուլտուրան զարգացած չէր, Harley վարողների թիվը քիչ էր։ Բայց մենք որոշեցինք հիմնել Mount Ararat Chapter-ը՝ որպես համաշխարհային Harley Owners Group ցանցի մաս», - պատմում է նա:

Լուսանկարը` Մեդիամաքս

Գրիգորիի խոսքով՝ խմբի կարեւորագույն սկզբունքներից է համայնքային կապը։ «Սա պարզապես մոտոցիկլետ վարելու մասին չէ։ Սա վստահության, ընկերության եւ ընդհանուր արժեքների մասին է », - բացատրում է նա:

Լուսանկարը` Մեդիամաքս

Mount Ararat Chapter-ի անդամների ընտրած անվանումը՝ «Apricot Rally», նույնպես կապված է հայկական խորհրդանիշների հետ։ «Արարատը մեր լոգոյում է, իսկ ծիրանը՝ մեր ինքնության մի մասն է։ Հունիսը ծիրանի սեզոնն է, ու մեր փառատոնն ուղեկցվում է ծիրանով եւ հայկական հյուրընկալությամբ», - նշում է Գրիգորին։

Լուսանկարը` Մեդիամաքս

Եթե առաջին փառատոնին մասնակցել էր մոտ 120 մարդ՝ 45 Harley-ով, ապա այս տարի գրանցվել է 179 մասնակից եւ մոտ 80 մոտոցիկլ։ 

Լուսանկարը` Մեդիամաքս

«Նախորդ տարվա թերություններից դասեր են քաղել։ Այս անգամ փորձել ավելի պրոֆեսիոնալ մոտեցում ցուցաբերել՝ հստակեցված երթուղի, տեխնիկական աջակցություն եւ այն», - պատմում է Գրիգոր Հարությունյանը:

Լուսանկարը` Մեդիամաքս

Փառատոնին մասնակցում են մոտոցիկլիստներ Ռուսաստանից, Բելառուսից եւ Վրաստանից։ 

Ռուսաստանից ժամանած Սերգեյն առաջին անգամ է Հայաստանում։ Եկել է ընկերների խորհրդով ու արդեն լավ տպավորություններ ունի։

Լուսանկարը` Մեդիամաքս

Սերգեյը մոտոցիկլիստ է արդեն 30 տարի, մասնակցել է փառատոների աշխարհի տարբեր վայրերում՝ Ամերիկայում, Աֆրիկայում, Եվրոպայում ու Ռուսաստանում։ 

«Ճանապարհներն այստեղ հաճելի են՝ ոլորաններ կան, բայց ոչ սուր, ասֆալտը որակյալ է։ Վարելիս հաճույք ես ստանում», - նկատում է նա։

Սերգեյն ասում է, որ Harley մոտոցիկլետի հաշվին իր կյանքում հայտնվել են հարյուրավոր լավ մարդիկ։ «Մենք միմյանց սիրում ենք, իսկ մոտոցիկլը մեզ կապող միջոցն է», - ժպտում է նա:

Լուսանկարը` Մեդիամաքս

Փառատոնի մասնակիցներից Իվան Շիխմինը Հայաստան է եկել Կրասնոդարից՝ կնոջ հետ։ 

Իվանի համար նման փառատոնները կարեւոր շփման համար։ «Հանդիպում ենք հին ընկերներին, ծանոթանում ենք նոր մարդկանց հետ», – պատմում է նա։

Լուսանկարը` Մեդիամաքս

Մոտոցիկլը պարզապես տրանսպորտ չէ, շեշտում է նա: «Սա մի հոբբի է, որը հոգու հանգստություն է ապահովում։ Նաեւ յուրահատուկ ֆիլտր է՝ մարդկանց ճանաչելու հարցում։ Այս փառատոններին հաճախ գալիս ենք ընտանիքով։ Այս անգամ երեխաները մեզ հետ չեն, բայց երբ ճանապարհը կարճ է լինում, նրանց էլ ենք վերցնում։ Մեզ համար սա արդեն ընտանեկան մշակույթ է», - ասում է Իվանը։

Գրիգորի Հարությունյանը

Լուսանկարը` Մեդիամաքս

Կազմակերպիչների նպատակն է «Apricot Rally»-ն դարձնել կանոնավոր միջազգային փառատոն։ «Ուզում ենք, որ Հայաստանը լինի այն վայրը, որտեղ տարեկան գոնե մեկ անգամ հավաքվում են Harley-Davidson-ի սիրահարները տարբեր երկրներից», - ասում է Գրիգորի Հարությունյանը։

«Apricot Rally 2025»-ի հովանավորներն ու գործընկերներն են Երեւանի կոնյակի գործարանը, «Արաթաշեն» գինու գործարանը եւ «Dargett» գարեջրի գործարանը։

Աստղիկ Հովհաննեսով

Լուսանկարները՝ Ագապե Գրիգորյանի