Մեդիամաքսն առանձնացրել է առաջիկա հանգստյան օրերի առավել հետաքրքիր եւ յուրահատուկ արշավները:

Առաջարկվող երթուղիների ամբողջական ցանկին կարող եք ծանոթանալ արշավական ակումբների սոցցանցերի էջերում:

Մայիսի 17 (շաբաթ)

Armenian Geographic արշավական ակումբ. Արշավ Ծաղկաձորից Բջնի

Շաբաթ օրն ակումբն իրականացնելու է գարնանային արշավ Ծաղկունյաց լեռներում: Երթուղին սկսվելու է Ծաղկաձորից, որտեղից Բջնի գետի կիրճով բարձրանալու եք դեպի Դալար լեռ (2616 մ)։ Դալարը Ծաղկունյաց լեռների ամենաբարձր գագաթներից է։ Ճանապարհն անցնում է անտառներով ու ալպիական մարգագետիններով։ Գագաթից հետո Բջնուսար լեռան փեշերով կիջնեք դեպի Հրազդանի կիրճ։ Երթուղին ավարտվելու է Բջնի գյուղում։

Լուսանկարը` Armenian Geographic

Քայլարշավի երկարությունը 16 կմ է, հարաբերական բարձրությունը՝ 700 մ:

Մանրամասները՝ հղումով:

ARI / ԱՐԻ արշավական ակումբ. Ծաղկունյաց լիճ եւ Նեղուցի վանք

Մայիսի 17-ին ակումբը մեկնում է Կոտայքի մարզ՝ Ծաղկունյաց լեռնաշղթան այս անկյունից բացահայտելու։ Վերելքը սկսվելու է Աղվերանից, որտեղից ոլոր-մոլոր ծաղկաշատ ճանապարհներով կհասնեք 2427 մ բարձրության վրա գտնվող Ծաղկունյաց լիճ: Այստեղից հրաշք տեսարաններ են բացվում դեպի Արարատ, Արայի լեռ, Գեղամա լեռնաշղթա եւ Թեղենիս։ Արշավի վերջում փոքրիկ կանգառ կլինի Նեղուցի վանքի մոտ:

Լուսանկարը` ARI / ԱՐԻ

Արշավի երկարությունը 11 կմ է, հարաբերական բարձրությունը՝ 530 մ:

Մանրամասները՝ հղումով:

ԱՐԻ Խոխա արշավական ակումբ. Արշավ Ապարանի ջրամբար

Շաբաթ օրը 3-6 տարեկան էլֆիկների եւ ծնողների հետ ակումբը գնում է Ապարանի ջրամբարի սոճիների անտառում թափառելու:  Անտառում կբացահայտեք բազմաթիվ ծաղիկներ եւ սնկեր: Նախատեսված է կանգառ երթուղու ամենասիրուն կետում, որտեղից հրաշք տեսարան է բացվում դեպի Արագած:

Լուսանկարը` ԱՐԻ Խոխա

Երթուղու երկարությունը 5 կմ է, բարդության աստիճանը՝ հեշտ:

Մանրամասները՝ հղումով:

Հանգստյան օրերին ԱՐԻ Խոխայի մյուս երթուղիներն՝ այստեղ:

Համշեն Տուր. Բացառիկ քայլարշավ Խուճապի վանք

Շարունակելով սահմանային կոթողներ ավանդական այցելությունները՝ մայիսի 17-ին ակումբը մեկնում է անկրկնելի ու շքեղ Խուճապի վանք։ Ճանապարհին կվայելեք Լոռվա հյուսիսի չքնաղ բնությունը՝ սաղարթախիտ անտառներ, արագահոս գետեր, տպավորիչ լեռներ։ Խուճապի վանքը մոտ է Վրաստանի հետ սահմանին եւ այստեղ այցելելու համար պահանջվում է հատուկ թույլտվություն: Քայլարշավը բարդ չէ, երթուղու ընդհանուր երկարությունը՝ մոտ 6 կմ:

Մանրամասները՝ հղումով:

Հանգստյան օրերին Համշեն Տուրի մյուս երթուղիներն՝ այստեղ:

«Խարույկ» արշավական ակումբ. Վերելք Եղնախաղաց լեռ

Շաբաթ օրն ակումբն իրականացնելու է վերելք դեպի Լոռվա անտառներում գտնվող Եղնախաղաց (1944 մ) լեռան գագաթ: Վերելքը սկսվելու է Քարինջ գյուղից, որտեղից անտառային շատ գեղեցիկ երթուղով բարձրանալու եք գագաթ:

Լուսանկարը` «Խարույկ»

Երթուղու ընդհանուր երկարությունը մոտ 15 կմ է, հարաբերական բարձրությունը՝ 700 մ:

Մանրամասները՝ հղումով:

Հանգստյան օրերին ակումբի մյուս երթուղներին՝ այստեղ:

Մայիսի 18 (կիրակի)

Հատիս Տուր. Վերելք Գութանասար եւ Սեւ պատ

Մայիսի 18-ին Հատիս Տուրն ուղեւորվում է Կոտայքի մարզ՝ վերելք կատարելու Գութանասար լեռ (2299 մ): Սա հանգած հրաբխային լեռնագագաթ է, որից բացվում է գեղեցիկ տեսարան դեպի Գեղամա, Ծաղկունյաց լեռնաշղթա, Արարատ եւ Արագած լեռներ։

Մանրամասները՝ հղումով:

Armenian Geographic արշավական ակումբ. Քարինջից Ակներ

Կիրակի օրն ակումբն իրականացնելու է արշավ Լոռիում՝ Քարինջից Ակներ։ Ճանապարհն անցնելու է Սեւորդյաց լեռների կատարային հատվածով։ Դրանք Գուգարաց լեռների արեւմտյան ճյուղավորումն են: Արշավը սկսվելու է Քարինջ գյուղից։ Այն հայտնի է Մարտիրոս Սարյանի կտավով, որը պատկերված է նաեւ 5000 դրամանոց թղթադրամի վրա։ Այստեղի կատարային հատվածից բացվում է գեղեցիկ տեսարան դեպի Դեբեդի կիրճն ու Վիրահայոց լեռները։

Լուսանկարը` Armenian Geographic

Ճանապարհն անցնում է անտառներով ու ալպյան մարգագետիններով։ Երթուղու երկարությունը 18 կմ է, հարաբերական բարձրությունը՝ 900 մ:

Մանրամասները՝ հղումով:

Հանգստյան օրերին ակումբի մյուս երթուղիներն՝ այստեղ:

Գիտարշավ ակումբ. Քայլարշավ դեպի Կկվի բույն բերդ եւ Բենդիկ

Մայիսի 18-ին ակումբը քայլարշավ կիրականացնի դեպի Կկվի բույն բերդ եւ Բենդիկ գյուղ, որոնք Լոռու մարզում են:  Արշավը սկսվելու է Շամլուղ քաղաքից, որտեղից կքայլեք դեպի Բենդիկ: Սա Հայաստանի տարածքում գտնվող հունական գյուղերից է, որն աչքի է ընկնում յուրահատուկ կոլորիտով:

Շարունակելով ճանապարհը՝ գեղատեսիլ անտառային արահետներով կքայլեք դեպի Կկվի բույն բերդ, որը թվագրվում է 10-12-րդ դարերով։ Քայլարշավի ընդհանուր երկարությունը մոտ 15 կմ է:

Մանրամասները՝ հղումով:

Հանգստյան օրերին ակումբի մյուս երթուղիներն՝ այստեղ:

4 Peaks Alpine Club մանկապատանեկան լեռնային ակումբ. Ծաթերից Քոբայր

Դարեր առաջ տեղացիների եւ վանականների կողմից օգտագործված Լոռու մարզի այս հնագույն արահետով ակումբն առաջարկում է քայլել Ծաթեր գյուղից Քոբայրի վանք: Այստեղից բացվում են շշմեցուցիչ տեսարաններ դեպի Դեբեդ եւ Մարց գետերի կիրճեր:

Լուսանկարը` 4 Peaks Alpine Club

Ծաթերից դեպի Քոբայրի վանք տանող արահետն անցնում է հսկա ժայռերի ուղեկցությամբ եւ անտառային հատվածով: Երթուղու երկարությունը 8 կմ է, հարաբերական բարձրությունը 200 մ:

Մանրամասները՝ հղումով:

ArmLand արշավական ակումբ. Արշավ դեպի Սեւանի ջրվեժներ

Լսե՞լ եք Սեւանի ջրվեժների մասին։ Դրանք բացահայտվել են հենց այս արշավական ակումբի կողմից եւ կիրակի օրն ArmLand-ը մեկնում է ջրվեժների ուղղությամբ:

Լուսանկարը` ArmLand

Արշավի ընթացքում հիանալի տեսարաններ են բացվում դեպի Սեւանա լիճ: Երթուղու երկարությունը 10 կմ է:

Մանրամասները՝ հղումով:

North Peak լեռնային ակումբ. Վերելք Դիմաց լեռ եւ Սառցապատ

Կիրակի օրն ակումբը հրավիրում է բոլոր լեռնասերներին վերելք կատարել Իջեւանի լեռների Դիմաց (2378 մ) եւ Սառցապատ (2532 մ) գագաթները։ Վերջինս համարվում է լեռնաշղթայի ամենաբարձր գագաթը։ Վերելքը սկսվելու է Հաղարծին վանական համալիր տանող ճանապարհից: Քայլելու եք ընդհանուր առմամբ մոտ 23 կմ՝ հավաքելով 1200 մ հարաբերական բարձրություն: Վերելքը միջին բարդության է: Եթե ցանկանում եք վերելք կատարել միայն Դիմաց լեռ, ապա այս երթուղին կլինի 18 կմ՝ 1000 մ հարաբերական բարձրությամբ:

Մասնակցության համար անհրաժեշտ է ունենալ բավարար ֆիզիկական մարզավիճակ եւ համապատասխան հանդերձանք։

Մանրամասները՝ հղումով:

ARI / ԱՐԻ արշավական ակումբ. Քայլարշավ Մարգավետի լեռներով

Մայիսի 18-ին ակումբը գնում է Լոռի-Տավուշ մարզերի սահմանագլուխ՝ քայլելու Մարգավետի լեռներով: Սա գարնանային թերապեւտիկ, սիրուն արշավներից է:

Լուսանկարը` ARI / ԱՐԻ

Քայլքը կսկսվի Մարգահովիտ գյուղից, որտեղից կհասնեք անտառում ծվարած 12-րդ դարի Ջուխտակ վանք: Արշավը կավարտվի Դիլիջանում:  

Երթուղու երկարությունը 16 կմ է:

Մանրամասները՝ հղումով:

Պատրաստեց Յանա Շախրամանյանը