Մեդիամաքսն առանձնացրել է առաջիկա հանգստյան օրերի առավել հետաքրքիր եւ յուրահատուկ արշավները: Առաջարկվող երթուղիների ամբողջական ցանկին կարող եք ծանոթանալ արշավական ակումբների սոցցանցերի էջերում:  

Ապրիլի 12-13 (հանգստյան օրերն ամբողջությամբ)

ARI / ԱՐԻ արշավական ակումբ. «Քաղցրահամ» Մեղրի

Ակումբը հրավիրում է երկօրյա այցի ժամանակ բացահայտել Սյունիքի մարզի պատմամշակութային եւ բնական ժառանգությունը:

Ճամփորդության առաջին օրն առավոտյան մեկնելու եք Հայաստանի հարավային դարպաս համարվող Մեղրի։ Ճանապարհին կանգառ կանենաք Աղիտուի 7-րդ դարի յուրօրինակ մահարձան կոթողի մոտ: Հաջորդ կանգառը նախատեսված է Որոտնավանքում։ Մինչ Մեղրի հասնելը կքայլեք նաեւ ռազմական կարեւոր հենակետ համարվող Բաղաբերդի ամրոց։ Ողջ ճանապարհին կվայելենք Զանգեզուրի լեռների համայնապատկերները: Գիշերակացը նախատեսված է հյուրատանը՝ Մեղրիում:

Երկրորդ օրը շրջայց կունենաք քաղաքում, ինչից հետո կմեկնեք Շվանիձոր, որն ամենակոլորիտային գյուղերից է:

Մանրամասները՝ հղումով:

Հանգստյան օրերին ARI / ԱՐԻ արշավական ակումբի մյուս երթուղիներն՝ այստեղ:

Ապրիլի 12 (շաբաթ)

ԱՐԻ Խոխա արշավական ակումբ. 3-6տ. արշավ Կարենիսից Քարաշամբ

Ապրիլի 12-ին ակումբը  3-6 տարեկան երեխաերի եւ ծնողների հետ մեկնում է Կոտայք՝ բացահայտելու մարզի պատմամշակութային եւ բնական հուշարձանները: Քայլարշավը սկսվելու է Կարենիս գյուղից, որտեղից իջնելու եք Հրազդանի ձոր: Այստեղ կտեսնեք 6-7-րդ դարերի Կարենիսի վանքն, ինչից հետո, անցնելով բազալտե կամարով, կհասնեք Քարաշամբ:

Լուսանկարը` ԱՐԻ Խոխա

Երթուղու երկարությունը 5 կմ է, բարդության աստիճանը՝ հեշտ:

Մանրամասները՝ հղումով:

ԱՐԻ Խոխա-ի մյուս երթուղիներն՝ այստեղ:

Armenian Geographic արշավական ակումբ. Արշավ դեպի Գողթանիկի ջրվեժ

Շաբաթ օրն ակումբը հրավիրում է մշակութային ճանաչողական այց իրականացնել Վայոց Ձորի մարզում՝ խոստանալով հիշարժան եւ տպավորիչ ճանապարհորդություն:

Օրվա սկզբում ուղեւորվելու եք Հերմոն գյուղ՝ իրականացնելու թեթեւ քայլարշավ դեպի Հերմոնի վանք (10-րդ դար): Այն եղել է մշակութային եւ կրոնական  խոշոր կենտրոն: Վանքի տարածքից գեղեցիկ տեսարան է բացվում դեպի Թեքսարի լեռներ։

Ուղեւորության հաջորդ կանգառն Արատես գյուղն է, որտեղ կտեսնեք 13-րդ դարի կարեւոր վանական համալիրներից մեկը՝ Արատեսի վանքը։

Լուսանկարը` Armenian Geographic

Հաջորդիվ կիրականացնեք քայլարշավ դեպի Գողթանիկի ջրվեժ, որտեղ հնարավորություն կունենաք վայելել գեղեցիկ բնապատկերներ:

Երթուղու ընդհանուր երկարությունը 9 կմ է: Այն հարմար է նաեւ սկսնակների համար:

Մանրամասները՝ հղումով:

Armenian Geographic արշավական ակումբ. Վերելք «Սֆինքս»

Ապրիլի 12-ին ակումբի մյուս հետաքրքիր արշավը նոր երթուղով վերելքն է «Սֆինքս» (1469 մ):

«Սֆինքս»-ը Երանոսի լեռնաշղթայի արտահայտված ու յուրահատուկ գեղեցկությամբ գագաթներից է։

Վերելքից հետո իջնելու եք Վարդագույն կիրճ ու Ազատի ջրամբար:

Լուսանկարը` Armenian Geographic

Քայլարշավի երկարությունը 14 կմ է, հարաբերական բարձրությունը՝ 800 մ: Երթուղին քարքարոտ է եւ կան դժվարանցանելի հատվածներ: Մասնակցության համար ցանկալի է ունենալ արշվական փորձ եւ պարտադիր՝ արշավական հանդերձանք:

Մանրամասները՝ հղումով:

Հանգստյան օրերին Armenian Geographic-ի մյուս երթուղիներն՝ այստեղ:

Ապրիլի 13 (կիրակի)

North Peak լեռնային ակումբ. Վերելք Մեծ Սեւքար

Կիրակի օրը ակումբը հրավիրում է բոլոր լեռնասերներին վերելք կատարել Վարդենիսի լեռների բարձր գագաթներից Մեծ Սեւքարը (3393 մ):

Երթուղին սկսվելու է Գեղարքունիքի մարզի Սելիմի ճանապարհից: Ընդհանուր առմամբ քայլելու եք մոտ 23 կմ՝ հավաքելով 1200 մ հարաբերական բարձրություն:

Վերելքը միջին բարդության է եւ դրան մասնակցելու համար պարտադիր է ունենալ լեռնային փորձ եւ ֆիզիկական լավ մարզավիճակ:

Լուսանկարը` North Peak

Մանրամասները՝ հղումով:

North Peak լեռնային ակումբի մյուս երթուղիներն՝ այստեղ:

«Խարույկ» արշավական ակումբ. Վերելք Երանոս լեռ / հատուկ երթուղի

Ապրիլի 13-ին ակումբն իրականացնելու է վերելք Երանոս լեռ (1824 մ)` առաջարկելով յուրահատուկ երթուղի:

Վերելքը սկսվելու է Ազատի ջրամբարից, որտեղից լեռան կատարային հատվածով բարձրանալու եք Երանոսի գագաթ, ապա լեռան հարավային գագաթի կողմից վերադառնալու եք Լանջազատ գյուղ:

Երթուղու ընդհանուր երկարությունը 22 կմ է, հարաբերական բարձրությունը՝ 1000 մ:

Արշավին մասնակցելու համար փորձը պարտադիր է:

Մանրամասները՝ հղումով:

«Խարույկ» արշավական ակումբի մյուս երթուղիներն՝ այստեղ:

4 Peaks Alpine Club մանկապատանեկան լեռնային ակումբ. Վերելք Կալասար

Կիրակի օրն ակումբը երեխաներին եւ պատանիներին հրավիրում է վերելք կատարել Կալասար լեռ (2230 մ): Մինչեւ վերելքը կայցելեք Եղեգիսի կիրճում գտնվող Հերմոնի վանք, որն, ըստ Ստեփանոս Օրբելյանի վկայության, կառուցվել է 936թ․-ին։

Կալասարի գագաթին դեռ պահպանվում են նույնանուն բերդի պատերից որոշ հատվածներ: Ենթադրվում է, որ այն Սմբատաբերդից ավելի հին է, ինչի մասին վկայում է պահպանված պատերի մեջ շաղախի բացակայությունը:

Լուսանկարը` 4 Peaks Alpine Club

Երթուղու երկկողմ երկարությունը 6 կմ է, հարաբերական բարձրությունը՝ 500 մ:

Արշավը հարմար է նաեւ լեռնային վերելքների փորձ չունեցող երեխաների համար։

Մանրամասները՝ հղումով:

Հատիս Տուր. Արշավ Դեբեդի կիրճում

Ապրիլի 13-ին Հատիս Տուրն ուղեւորվում է Լոռու մարզ՝ քայլելու Դեբեդի կիրճում: Երթուղին սկսվելու է Օձունի Ս. Աստվածածին եկեղեցու մոտից, որտեղից Դեբեդի կիրճով քայլելու եք Հոռոմայրի վանք։ Նախատեսված է այցելել նաեւ Քոբայրի վանական համալիր, որը միջնադարյան կարեւոր մշակութային կենտրոններից մեկն է:

Մանրամասները՝ հղումով:

Համշեն Տուր. Պատմական Արտաշատ / բացառիկ քայլարշավ

Կիրակի օրը Համշեն Տուրը հրավիրում է բացառիկ քայլարշավի դեպի պատմական Արտաշատ: Երբեմնի ծաղկուն մայրաքաղաքը, որը տարածվել է Արաքսի ափերին՝ Խոր Վիրապին հարակից բլուրների վրա, պատրաստ է իր պատմական շերտերով զարմացնել այցելուներին։ Լինելով սահմանային շերտում՝ Արտաշատ հնավայր այցելությունը նախատեսում է հատուկ թույլտվություն, որը խմբի անդամները կունենան։

Ոչ բարդ քայլարշավի ընդհանուր երկարությունը մոտ 5 կմ է։ Արշավական հանդերձանք եւ կոշիկներ ունենալը նախընտրելի է:

Մանրամասները՝ հղումով:

Համշեն Տուրի մյուս երթուղիներն՝ այստեղ:

Գիտարշավ ակումբ. Քայլարշավ դեպի Շաղոտ ջրվեժ

Ապրիլի 13-ին Գիտարշավ ակումբը մեկնում է Տավուշի մարզ՝ քայլելու դեպի Շաղոտ ջրվեժ:

Քայլարշավը սկսվելու է Թեղուտ գյուղից, որտեղից անտառներով եւ կանաչ մարգագետիններով կհասնեք ջրվեժ: Այն Դիմաց եւ Սառցապատ լեռների լանջին է եւ այստեղից գեղեցիկ տեսարան է բացվում դեպի Աղստեւ գետի հովիտ։

Քայլարշավի ընդհանուր երկարությունը մոտ 15 կմ է:

Մանրամասները՝ հղումով:

Գիտարշավի մյուս երթուղիներն՝ այստեղ:

Պատրաստեց Յանա Շախրամանյանը