Միջպետական երկաթուղու եւ Մ6 մայրուղու վերականգնումը բավական ժամանակ կպահանջի - Mediamax.am

890 դիտում

Միջպետական երկաթուղու եւ Մ6 մայրուղու վերականգնումը բավական ժամանակ կպահանջի


Լուսանկարը` ՀՀ կառավարության մամուլի ծառայություն


Երեւան: Մեդիամաքս: Հայաստանի վարչապետ Նիկոլ Փաշինյանի գլխավորությամբ այսօր անցկացվել է Լոռու եւ Տավուշի մարզերում արտակարգ իրավիճակի կառավարման օպերատիվ շտաբի հեռավար նիստ:

Տարածքային կառավարման եւ ենթակառուցվածքների նախարար Գնել Սանոսյանը նշել է, որ Լոռու եւ Տավուշի մարզերում, հատկապես Աղստեւ եւ Դեբետ գետերի ջրամբար ավազաններում ջրերի վարարումների հետեւանքներով արձանագրվել են մի շարք ավերածություններ:

 

«Հատկապես հինգ գոտում ավերածություններն էական են՝ Ալավերդին, Տաշիրը, Ալավերդուց դեպի Այրում հատվածը, Այրումից դեպի Բագրատաշեն հատվածը եւ Դիլիջանից դեպի Իջեւան հատվածը: Ամենամեծ վնասները հիմնականում Ալավերդիից դեպի Բագրատաշեն ուղղությամբ է արձանագրվել: Տարբեր ենթակառուցվածքներ, մասնավորապես, Մ6 միջպետական ճանապարհը, կամուրջներ, երկաթգիծը, ջրագծեր, էլեկտրահաղորդման գծեր, գազատարներ եւ այլ ենթակառուցվածքներ:

 

Ալավերդի համայնքում կա 9 բնակավայր, որոնք կամուրջների վնասման հետեւանքով ունեն Ալավերդի քաղաքի հետ կապի խնդիր եւ հիմա իրականացվում են այդ բնակավայրերի տարանցիկ այլ ճանապարհների կազմակերպման եւ նրանց կապի հաստատման հետ կապված աշխատանքներ:

 

Ընդհանուր ունենք վնասված 14 կամուրջ, կան նաեւ համայնքային նշանակության ավելի փոքր կամուրջներ»,- ասել է Գնել Սանոսյանը:

 

Նա նշել է, որ Լոռու մարզում մոտ 2 500 բնակիչ դեռեւս զրկված է էլեկտրաէներգիայից, իսկ Տավուշի մարզում՝ մոտ 1000 բնակիչ: Մի շարք հատվածներում կան նաեւ գազամատակարարման հետ կապված խնդիրներ:

 

Նախարարի խոսքով՝ մեծ վնասներ է կրել երկաթուղին, ընդհանուր մոտ 2,5 կմ:

 

«Լուրջ վնասներ է պատճառվել եւ բավական ժամանակ կպահանջի երկաթուղու աշխատանքը վերականգնելու ուղղությամբ: Շատ լուրջ վնասներ է կրել Մ6 մայրուղին, մոտ 8-9 հատվածում ճանապարհը կամ ամբողջությամբ, կամ մասնակի քանդվել է: Լուրջ վնասներ է պատճառվել Մ4 միջպետական ճանապարհի հինգ հատված, բայց երեկ ամբողջ օրն ափապաշտպան աշխատանքները հնարավորություն տվեցին ճանապարհը թեկուզ վնասված, բայց անցանելի պահպանել»:

 

Հեղեղումների հետեւանքով զոհերի թիվն այս պահին 4 է:

 

Խոսելով կտրված գյուղերի վիճակի մասին՝ վարչապետը հանձնարարել է ուղղաթիռներով ապրանքների մատակարարումներ ապահովել: Փաշինյանը հանձնարարել է կարճաժամկետ կարիքները գույքագրել եւ հրատապության ռեժիմով իրականացնել, ինչպես նաեւ միջնաժամկետ եւ երկարաժամկետ կարիքների գույքագրում իրականացնել:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին