2023 թվականի սեպտեմբերի 20-ին լրացավ Armenia Grateful 2 Rock/Rock Aid Armenia ծրագրի շրջանակում Գյումրիի թիվ 6 երաժշտական դպրոցի նոր շենքի բացման 10-րդ տարեդարձը:

Հոբելյանին ընդառաջ Deep Puple խմբի երգիչ Իեն Գիլանը եւ Black Sabbath խմբի կիթառահար Թոնի Այոմին նամակներ էին ուղարկել դպրոցի ուսուցիչներին եւ աշակերտներին:

Հասարակություն | 2013-09-20 11:23:43

Իէն Գիլանի մասնակցությամբ Գյումրիում բացվել է թիվ 6 երաժշտական դպրոցը

Սեպտեմբերի 20-ին պատրաստվում էինք հրապարակել դրանք նաեւ մեր կայքում, սակայն Ադրբեջանը հարձակվեց Արցախի վրա:

Այնուամենայնիվ, որոշեցինք նամակները հրապարակել այսօր, որպեսզի համատարած հուսահատության մթնոլորտում ցույց տանք, որ աշխարհում կան մարդիկ, որոնք անտարբեր չեն Հայաստանի եւ հայ ժողովրդի հանդեպ:

2013-ին Իեն Գիլանը եկել էր Հայաստան՝ հատուկ դպրոցի բացմանը մասնակցելու համար, իսկ 2019 թվականին Իեն Գիլանը եւ Թոնի Այոմին միասին այցելեցին դպրոց:

Ստորեւ ներկայացնում ենք նամակները:

2023թ. սեպտեմբերի 8

«Գյումրիի մեր դպրոցի» անձնակազմին և ուսանողներին

Սիրելինե՛ր,

Առիթից օգտվելով՝ ցանկանում եմ բոլորիդ շնորհավորել դպրոցի 10-ամյակի կապակցությամբ:

Ուրախություն և պատիվ էր փոքրիկ դեր խաղալ ձեր գեղեցիկ երաժշտական դպրոցի կառուցման գործում:

Հիշում եմ, թե ինչպես էր ջարդուխուրդ պատերի միջով փչում ցրտաշունչ քամին, հիշում եմ ձեր սառած ձեռքերը, բայց դուք բոլորդ դիմացաք այդ դժվարին պայմաններին և նվիրվեցիք երաժշտությանը։ Այդ խարխուլ վայրում ինձ խորապես հուզել էր անձնակազմի անձնվեր աշխատանքը և աշակերտների ջանասիրությունը։

Իմ սրտում բոլորիդ համար հատուկ տեղ կա, ուստի ձեզ սեր ու քաջալերանք եմ հղում՝ այս պարզ ուղերձով. «Երաժշտությունը կարող է կյանքի ընկեր դառնալ», ուստի, խնդրում եմ, շարունակե՛ք աշխարհը լցնել մեղեդիով, ներդաշնակությամբ ու ռիթմով, վարպետությամբ և արտահայտչականությամբ: Դա իրոք շատ կարևոր է բոլորիս համար:

Շնորհակալ եմ ձեր հիանալի աշխատանքի համար, հուսով եմ՝ շուտով նորից կտեսնեմ ձեզ:

Մեծ սիրով՝

Իեն Գիլան

Իեն Գիլանը եւ Թոնի Այոմին Հայաստանում 2019 թվականին

Լուսանկարը` Մեդիամաքս

2023 թ. սեպտեմբերի 14

Գյումրիի երաժշտական դպրոցին

Ողջույններ Մեծ Բրիտանիայի՛ց:

Հավատս չի գալիս, որ 14 տարի է անցել այն օրվանից, ինչ ես առաջին անգամ եկա Հայաստան, և Ջոնն ու Արան մեզ բերեցին ձեր դպրոց:

Ի~նչ մեծ տարբերություն էր, երբ վերադարձա 4 տարի առաջ. հին թիթեղյա տնակներից՝ մաքուր, ջեռուցվող սենյակներ և բազում գործիքներ: Շնորհակալություն Կանադայի Թիմ Իրվինգին՝ ի թիվս այլոց:

Իմ այցերից ես գիտեմ, որ դպրոցում շատ բարձր չափանիշ է սահմանված, և հուսով եմ, որ բոլոր նրանք, ովքեր կգան այստեղ, կվայելեն դպրոցում անցկացրած իրենց ժամանակը. թող այն լինի ուրախ ու հաճելի, ինչպես նաև կրթություն պարգեւող:

Լավագույն մաղթանքներով,

Թոնի Այոմի