Երեւան: Մեդիամաքս: ՀՀ առողջապահության նախարար Արսեն Թորոսյանն այսօր ասել է, որ վերջին օրերին կորոնավիրուսից առողջացածների թվի աճը պայմանավորված է տնային բուժում ստացող վարակակիրների 14-օրյա ինքնամեկուսացումից դուրս գալով:

«Ասիմպտոմներ կամ թեթեւ սիմպտոմներ ունեցող քաղաքացիներին մայիսի կեսերից տեղափոխեցինք տնային հսկողության ու խնամքի: Այնպես ստացվեց, որ մոտ 1 000 հոգի համակարգում չնշվեցին որպես առողջացածներ եւ գնացին 14-օրյա տնային ինքնամեկուսացման: Այդ ընթացքում մենք բուժված համարել ենք միայն այն քաղաքացիներին, որոնք ուղիղ հիվանդանոցներից էին դուրս գրվում՝ կրկնակի բացասական թեստավորումով:

Իսկ հիմա առողջության առաջնային պահպանման հաստատությունները ֆիքսում են 14 օրվա ավարտն ու տներում ինքնամեկուսացված քաղաքացիների բուժված լինելու հանգամանքը: Տնային բուժում ստացողները վերջնական թեստավորում չեն անցնում, այլ ուղղակի 14 օրը լրանալուց հետո համարվում են առողջացած:

Նույնը տեղի է ունենալու նաեւ նոր արձանագրված դեպքերի հետ, որոնք ընդհանրապես հիվանդանոցային համակարգ չեն ընդունվում»,- մանրամասնել է նախարարը:

Նա ասել է, որ առողջացածների վաղվա թիվը այսօրվա 352-ից շատ ավելի մեծ կլինի:

Արսեն Թորոսյանի խոսքով՝ «սա ռազմավարության փոփոխության արդյունք է, ոչ թե հակահամաճարակային պրոցեսի ճեղքում»:

Թորոսյանն ասել է, որ երեկվա ու այսօրվա արձանագրվող ցածր թվերից չպետք է թուլանալ:

«Գործողությունների մեր ընդհանուր տրամաբանությունը դեռ երկար պետք է մնա վարակի զսպումը, ինչը հնարավոր է հակահամաճարակային կանոնների խստորեն պահպանման դեպքում»,- հավելել է նախարարը: