Երեւան: Մեդիամաքս: Կառավարության աշխատակազմի ղեկավար Էդուարդ Աղաջանյանն այսօր հայտնել է, որ անվտանգային միջոցառումներից ելնելով՝ ապրիլի 24-ին Ծիծեռնակաբերդի հուշահամալիրի մուտքը փակ է լինելու:

Այս որոշումը կհաստատի պարետատունը:

Հայոց ցեղասպանության 105-րդ տարելիցի միջոցառումների մեկնարկը կտրվի ապրիլի 23-ին՝ ժամը 21:00-ին:

«Այդ ժամին կհնչեն եկեղեցական զանգերի ղողանջները, որոնց ներքո կմարվեն Երեւանի եւ մարզկենտրոնների փողոցների լույսերը: Կոչ ենք անելու նաեւ մեր քաղաքացիներին մարել իրենց բնակարանների լույսերը եւ բջջային հեռախոսների լույսերի վառումով պատուհաններից խորհրդանշել միասնական ներկայություն անմար կրակի շուրջ: Լուսավառ ոգեկոչման րոպե կունենա նաեւ իր խորհրդանշական արձագանքը Ծիծեռնակաբերդի հուշահամալիրից:

Իսկ ապրիլի 24-ին առավոտյան 8:00-ից սկսած քաղաքացիները կարող են հաղորդագրություն ուղարկել 1915 կարճ համարին` իրենց անվամբ հաստատելու հեռակա մասնակցությունը օրվան: 

Հաղորդագրություն ուղարկած քաղաքացիների անունները կարտացոլվեն հուշահամալիրի սյուներին»,- մանրամասնել է վարչապետի աշխատակազմի ղեկավարը:

Նա նշել է, որ ապրիլի 24-ին ժամը 10:00-ից Ծիծեռնակաբերդ կայցելեն ՀՀ վարչապետը, նախագահը, ԱԺ նախագահը եւ Ամենայն Հայոց Կաթողիկոսը: