Երեւան: Մեդիամաքս: Թբիլիսիի ինֆեկցիոն հիվանդանոցի տնօրեն Թենգիզ Ցերցվաձեն կարծում է, որ «աշխարհում ոչ մի տեղ բնակչությունը պաշտպանված չէ կորոնավիրուսից այնպես, ինչպես Վրաստանում»:

Ինչպես հայտնում է Новости-Грузия -ն, Թենգիզ Ցերցվաձեն վստահություն է հայտնել, որ Վրաստանը կհաղթահարի կորոնավիրուսի համաճարակը նվազագույն կորուստներով:

«Իմ կանխատեսումներով ՝ վարակակիրների թիվը չի գերազանցի հազարը: 2-3 շաբաթվա ընթացքում կհասնենք գագաթնակետին: Դա կլինի ոչ թե բռնկում, այլ դանդաղ գագաթնակետ, որը կտեւի եւս 2-3 շաբաթ: Վրաստանը դուրս կգա այս իրավիճակից նվազագույն կորուստներով», - ասել է Ցերցվաձեն:

Նա կարծում է, որ Վրաստանում գագաթնակետային ժամանակահատվածում չի գրանցվի օրական վարակման 100-ից ավել դեպք:

«Այդ մասին վկայում է վարակի տարածման դինամիկան: Մառնեուլիում տեղի ունեցավ ներքին անվերահսկելի տարածում, բայց տեղայնացումը կատարվեց այնքան արագ, որ վարակը չհասցրեց տարածվել», - նշել է Ցերցվաձեն:

«Եթե նայեք աշխարհի մասշտաբով, ապա վարակի եւ մահացության տարածման առումով Վրաստանը զբաղեցնում է 109-րդ տեղը: Մեզ հաջորդում են միայն էկզոտիկ, արեւադարձային պետությունները»,- ընդգծել է բժիշկը:

Միաժամանակ, նա շեշտել է, որ Վրաստանի բնակչությունը պետք է շարունակի պահպանել բժիշկների բոլոր ցուցումները:

«Ուզում եմ, որ դուք իմանաք. եվրոպական ոչ մի երկրում եւ, հավանաբար, աշխարհի որեւէ այլ երկրում, այսօր բնակչությունը պաշտպանված չէ այնպես, ինչպես Վրաստանում: Եվ եթե ինչ-որ մեկը հիվանդանա, եւ սա անխուսափելի է, ապա մենք ՝ բժիշկներս, պատասխանատվություն ենք ստանձնում փրկել իրենց կյանքը », - ասել է Ցերցվաձեն:

Ապրիլի 7-ի դրությամբ Վրաստանում գրանցվել էր կորոնավիրուսի 195 դեպք: 3-ը մահացել են, 46-ը՝ բուժվել: