Երեւան: Մեդիամաքս: Ռուսաստանի նախագահ Դմիտրի Մեդվեդեւն այսօր հայտարարել է, որ նախօրեին կյանքից հեռացած Գեւորգ Վարդանյանը «եղել է հայրենական արտաքին հետախուզության պատմության մեջ մտած փայլուն հատուկ գործողությունների մասնակից»:

Ինչպես հաղորդում է Մեդիամաքսը, ՌԴ նախագահը ցավակցական հեռագիր է հղել Գեւորգ Վարդանյանի տիկնոջը` Գոհար Վարդանյանին:

«Անկեղծորեն կիսում եմ Ձեր ընտանիքի մեծ վիշտը: Կյանքից հեռացավ Գեւորգ Վարդանյանը` լեգենդար հետախույզ, իր երկրի իսկական հայրենասերը, վառ եւ  արտակարգ անձնավորություն: Նա եղել է փայլուն հատուկ գործողությունների մասնակից, որոնք մտել են հայրենական արտաքին հետախուզության պատմության մեջ: Գեւորգ Վարդանյանի վախճանն անփոխարինելի կորուստ է իր հարազատների եւ բոլոր նրանց համար, ովքեր ճանաչում եւ գնահատում էին այդ հիանալի մարդուն», - ասվում է հեռագրում:

ԽՍՀՄ հերոս Գեւորգ Վարդանյանը վախճանվել է հունվարի 10-ին Մոսկվայում` 88 տարեկան հասակում:

ԻՏԱՌ-ՏԱՍՍ-ը գրում է, որ Գեւորգ Վարդանյանը ծնվել է 1924թ. փետրվարի 17-ին Ռոստովում իրանի քաղաքացի, ձեթի գործարանի տնօրեն Անդրեյ Վարդանյանի ընտանիքում: 1930-ին, երբ Գեւորգը 6 տարեկան էր, ընտանիքը տեղափոխվել է Իրան: Նրա հայրը կապված էր խորհրդային արտաքին հետախուզության հետ եւ լքել էր ԽՍՀՄ-ը հանձնարարություն կատարելու նպատակով: Առեւտրային գործունեության ներքո Անդրեյ Վարդանյանը իրականացնում էր հետախուզական աշխատանք, եւ Գեւորգը հետախույզ է դարձել հենց նրա ազդեցության ներքո:

1942 թ-ին «Ամիր» օպերատիվ կեղծանվան ներքո գործող Գեւորգ Վարդանյանը ներգրավվել է Թեհրանի անգլիական հետախուզական դպրոցում: 1943-ի նոյեմբեր-դեկտեմբերին Թեհրանյան կոնֆերանսի ժամանակ «Ամիրը» մասնակցել է «մեծ եռյակի» առաջնորդների անվտանգության ապահովմանը:

1951 թ-ին Վարդանյանը դուրս է բերվել ԽՍՀՄ: Այնուհետեւ աշխատել է տարբեր երկրներում, այդ թվում` Իրանում, Իտալիայում, Ֆրանսիայում եւ Հունաստանում: Հետախույզի արտասահմանյան գործուղումները տեւել են մինչեւ 1986թ., իսկ ծառայության մեջ էր մինչեւ 1992-ը: