Երեւան: Մեդիամաքս: System of a Down ռոք-խումբը 2020 թվականին համերգ կտա Երեւանում:

Այդ մասին այսօր Երեւանում ասել է խմբի երգիչ Սերժ Թանգյանը: Նա տեղեկացրել է, որ համերգը կկայանա System of Down-ի եվրոպական շրջագայության շրջանակում, որը մեկնարկելու է 2020թ. հունիսին:

Սերժ Թանգյանն ասել է, որ երեւանյան համերգի անցկացման վայրը դեռ հաստատված չէ:

Խմբի պաշտոնական կայքում ներկայացված ժամանակացույցի համաձայն, շրջագայությունը մեկնարկում է հունիսի 3-ին Ամստերդամից:

2020 թվականի հունիսի համար System of Down-ն արդեն 14 հաստատված համերգ ունի՝ Գերմանիայում, Ավստրիայում, Միացյալ Թագավորությունում, Չեխիայում, Հունգարիայում, Շվեյցարիայում, Շվեդիայում, Ֆինլանդիայում, Լեհաստանում, Պորտուգալիայում եւ Իսպանիայում:

Ամենայն հավանականությամբ, խումբը Երեւանում հանդես կգա մինչեւ եվրոպական շրջագայության մեկնարկը:

System of a Down-ի առաջին եւ միակ համերգը Երեւանում կայացել է 2015 թվականի ապրիլի 23-ին՝ Հանրապետության հրապարակում: