Երեւան: Մեդիամաքս: «Լիդիան Արմենիա»-ն ունի Հայաստանի համար աննախադեպ բնապահպանական հետազոտություններ:

Այդ մասին այսօր Մեդիամաքսին հայտնել են ընկերությունում:

Օգոստոսի 8-ին ՀՀ կառավարության նիստում Քննչական կոմիտեի նախագահ Հայկ Գրիգորյանը, մասնավորապես, ասել էր, որ «ողջամիտ ժամկետներում «Լիդիան Արմենիա» ընկերության կողմից վարույթն իրականացնող մարմնի միջոցով  փորձագետներին տրամադրվել է փորձագետների կողմից պահանջված շուրջ 300 անուն փաստաթղթեր եւ ելակետային տվյալներ, որից միայն փաստաթղթերը կազմել են շուրջ 20 հազար թերթ»: 

Մեդիամաքսը «Լիդիան Արմենիա»-ին խնդրեց մեկնաբանել Քննչական կոմիտեի նախագահի ներկայացված տեղեկությունը:

«Ինչպես բազմիցս հայտարարել ենք, մենք ունենք Հայաստանի համար աննախադեպ բնապահպանական հետազոտություններ եւ միջազգային լավագույն չափանիշներով նախագծված հանք: 

Փորձաքննությանը, ինչպես նշվեց երեկ, տրամադրել ենք ավելի քան 300 անուն փաստաթուղթ: Չի եղել հարց կամ պարզաբանման պահանջ, որի վերաբերյալ մենք չենք տրամադրել համապարփակ հետազոտություն, գիտական հիմնավորում: 

Ընդհանուր առմամբ, տրամադրել ենք 20 հազար էջ փաստաթուղթ: Կարծում ենք, սա առավել քան խոսուն թիվ է: Խոսքը Հայաստանի համար բացառիկ ու նույնիսկ միջազգային պրակտիկայի համար օրինակելի քանակի ու որակի բնապահպանական հետազոտությունների, ռիսկերի գնահատման, կանխարգելման միջոցառումների մասին է: Սա, կարծում ենք, թե՛ աննախադեպ բնապահպանական աշխատանքի, թե՛ թափանցիկության վկայություն է», - նշել են ընկերությունում: