Երեւան: Մեդիամաքս: Հուլիսի 18-ին «Մոսկվա» կինոթատրոնում ամփոփվեցին «Ոսկե Ծիրան» Երեւանի միջազգային 12-րդ կինոփառատոնի արդյունքները:

«Այս մի քանի օրը Երեւան քաղաքի ու երեւանցիների մասին հիացմունքի խոսքեր եմ լսում մեր հյուրերից ու դրանք ինձ երջանկացնում են: Մեր հյուրերը գալիս ու գնում են, իսկ մենք միշտ մնալու ենք այստեղ ու կրկին սպասենք նրանց», - հանդիսատեսին ողջունեց կինոփառատոնի տնօրեն Հարություն Խաչատրյանը:

Հիմնական մրցութային անվանակարգերը պահպանվել էին՝ միջազգային խաղարկային, միջազգային վավերագրական, հայկական համայնապատկեր եւ «Կորիզ» կարճամետրաժ ֆիլմեր:

Առաջին անգամ «Ոսկե Ծիրան»-ի շրջանակներում հանձնվեց «Հանդիսատեսի համակրանք» մրցանակը, որին արժանացավ գերմանացի ռեժիսոր Մարկ Բրումունդը՝ իր «Սրբարան» ֆիլմի համար: Lավագույն սցենարի համար Հրանտ Մաթևոսյան անվան հատուկ մրցանակը շնորհվեց Գագիկ Մադոյանին:

Լուսանկարը` Մեդիամաքս

Միջազգային խաղարկային մրցույթում «Ոսկե Ծիրան» մրցանակի արժանացավ կոլումբիացի ռեժիսոր Սիռո Գեռայի «Օձի գրկում» ֆիլմը: Ներկայացնում ենք նաեւ այլ անվանակարգերի հաղթողներին.

Ժյուրիի հատուկ մրցանակ. «Իշկանուլ», ռեժիսոր Խայրո Բուստամանտե

Միջազգային վավերագրական մրցույթ -  «Իմաստի ստեղծումը», ռեժիոր Սիմոնե Ռապիզարդա Կազանովա

«Կորիզ» կարճամետրաժ ֆիլմերի մրցույթ - «Ամեն ինչ լավ կլինի», ռեժիսոր Պատրիկ Ֆոլռաթ

Ժյուրիի հատուկ մրցանակ - «Ամեն ինչ՝ վաճառքի», ռեժիսոր Ֆարհադ Ղոլամի

Հայկական համայնապատկեր ազգային մրցույթ - «Մեկ, երկու, երեք», ռեժիսոր Արման Երիցյան

Ֆիպրեսի մրցույթ - «Մոսկվիչ, իմ սեր», ռեժիսոր Արամ Շահբազյան

Էկումենիկ մրցույթ - «Մոսկվիչ, իմ սեր», ռեժիսոր Արամ Շահբազյան

Խրախուսական մրցանակ.  «Սիվաս», ռեժիսոր  Քաան Մյուժդեջի