Երեւան: Մեդիամաքս: Դեկտեմբերի 1-ին եւ 2-ին Երեւանում ավագ դպրոցականների համար անցկացվել է «Ռոսատոմ»-ի՝ ֆիզիկայի, մաթեմատիկայի եւ ճարտարագիտության Օլիմպիադայի նախընտրական փուլը, որին մասնակցել է ավելի քան 200 դպրոցական։
Միջոցառումն անցկացրել են ՄԻՖԻ Ազգային հետազոտական միջուկային համալսարանը եւ «Ռոսատոմ» պետկորպորացիան՝ Հայաստանի ազգային պոլիտեխնիկական համալսարանի համագործակցությամբ:
Օլիմպիադայի եզրափակիչ փուլը տեղի կունենա 2019թ. գարնանը։
«Այսօր ժամանակակից տնտեսության համար անհրաժեշտ է որակավորված ինժեներների առկայությունը: Բացառություն չէ ատոմային էներգետիկան: Ներկա պահին Հայկական ԱԷԿ-ում իրականացվում են արդիականացման եւ մինչեւ 2026թ. կայանի շահագործման ժամկետի երկարաձգման աշխատանքներ: Ուսումնասիրվում են նոր կայանի կառուցման հնարավորությունները, քանի որ ատոմային գեներացիան Հայաստանի համար հիմնականներից է եւ այդ պատճառով երկրին հատուկ անհրաժեշտ են ատոմային բնագավառի համար որակավորված կադրեր»,- ասել է էներգետիկ ենթակառուցվածքների եւ բնական պաշառների նախարարության ատոմային էներգետիկայի բաժնի պետ Արտեմ Պետրոսյանը։
Երեւանում գիտության եւ մշակույթի ռուսական կենտրոնի տնօրենի Սերգեյ Ռիբինսկիի խոսքով՝ օլիմպիադայում մասնակցությունը տաղանդավոր երիտասարդների համար փայլուն հնարավորություն է իրենց ներկայացնելու և ռուսաստանյան առաջատար բուհերի ուսանողների շարքերը համալրելու համար։
Այս պահին մեկնարկել է բակալավրիատի, մագիստրատուրայի եւ ասպիրանտուրայի ծրագրերով Ռուսաստանում սովորելու համար հայ ուսանողների ընտրությունը: Այն կտեւի մինչեւ փետրվարի 15-ը:
Ցանկացողները պետք է գրանցվեն Russia.study կայքում, լրացնեն ձեւանմուշը եւ Երեւանում գիտության եւ մշակույթի կենտրոնում հարցազրույց անցնեն:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: