Երեւան: Մեդիամաքս: ՀՀ գլխավոր դատախազության աշխատանքային խումբն ուսումնասիրել է խախտումների վերաբերյալ ՀՀ նախագահի թեկնածու Րաֆֆի Հովհաննիսյանի նախընտրական շտաբի կողմից փետրվարի 19-ին տարածած ամփոփագիրը։

Ինչպես հաղորդում է ՀՀ գլխավոր դատախազության մամուլի ծառայությունը, ուսումնասիրության արդյունքում պարզվել է, որ որպես խախտում հիշատակվող 121 ծանուցումներից 52-ը պարունակում են ընտրախախտումների վերաբերյալ քրեական օրենսգրքով նախատեսված հանցագործության մասին տեղեկություններ։ Դրանցից 41-ն ուղարկվել են ոստիկանության ստորաբաժանումներ, իսկ մնացած 11-ը կրկնվող հաղորդումներ են, քանի որ նախկինում դրանց վերաբերյալ ահազանգեր դատախազությունը եւս ստացել էր եւ օրենքով սահմանված կարգով ընթացք տվել։

Ամփոփագրին կցված՝ ընտրախախտումների վերաբերյալ տեսանյութերից 2-ը եւս համապատասխան մարմինների կողմից քննության կենթարկվեն:

Ընդհանուր առմամբ, քվեարկության օրն արձանագրված խախտումների վերաբերյալ դատախազությունն ընթացք է տվել 128 հաղորդման: Քննության արդյունքների մասին կտեղեկացվի ավելի ուշ: