Երեւան: Մեդիամաքս: Հայաստանի վարչապետ Նիկոլ Փաշինյանն այսօր ասել է, որ իր օրակարգում հրաժարականի հարց չկա:
Այսօր կայացած առցանց մամուլի ասուլիսի ժամանակ վարչապետն ասել է, որ այսօր իր օրակարգում բացառապես Հայաստանի անվտանգության եւ կայունության ապահովման հարցն է:
Նիկոլ Փաշինյանն ասել է, որ բացառում է բռնությունը ընդդիմախոսների նկատմամբ եւ նշել է, որ եթե «ընդդիմությունը եւս բացառի բռնությունը, այդ դեպքում կարող ենք համատեղ ուժերով քննարկել այս իրավիճակից դուրս գալու տարբերակները»:
«Որեւէ կասկած չկա, որ ես եմ տեղի ունեցածի թիվ մեկ պատասխանատուն: Ինձ հաշիվ եմ տալիս, որ պետք է կանգնեմ, պայմանական ասած, ժողովրդի դատի առջեւ: Բայց որպեսզի ժողովուրդը ճիշտ եզրահանգումներ անի, այն պետք է տիրապետի բոլոր մանրամասներին», - ասել է վարչապետը:
Խոսելով պատերազմի պատճառների մասին, Նիկոլ Փաշինյանն ասել է, որ «2018 թվականի մայիսի դրությամբ բանակցային գործընթացը գտնվում էր տարածքների հանձնում ոչնչի դիմաց տրամաբանության մեջ»:
«Իմ վարած քաղաքականությունը եղել է չհամաձայնել այդ տրամաբանության հետ, փորձել փոխել այն: Ցավոք, դա մեզ չի հաջողվել, որովհետեւ ձեւավորվել էր միջազգային կոնսենսուս առ այն, որ տարածքները պետք է հանձնվեն առանց նախապայմանների», - ասել է վարչապետը:
Խոսելով պատերազմի ընթացքի մասին, Նիկոլ Փաշինյանն ասել է, որ «կռվել եւ դիմադրել ենք այնքան ժամանակ, քանի դեռ դիմադրությունը իմաստ է ունեցել»:
Վարչապետը հերքել է պնդումներն այն մասին, որ «Շուշին հանձնվել է»: «Դավադիր որոշումներ չեն եղել», - շեշտել է նա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: