Երեւան: Մեդիամաքս: ԵՄ-ի գլխավոր բանակցող Գունար Վիգանդը Մեդիամաքս-ի հետ բացառիկ հարցազրույցում ասել է, որ "Հայաստանն իսկապես շատ լավ առաջընթացի է հասել ԵՄ-ի հետ ազատ տնտեսական գոտի ստեղծելու վերաբերյալ բանակցությունների գործընթացում` Եվրոպական հանձնաժողովի առանցքային առաջարկների հիման վրա”:

“Բանակցությունները սկսելու համար անհրաժեշտ պահանջներից շատերն արդեն իրագործված են”, - հայտարարել է ԵՄ-ի գլխավոր բանակցողը:

Նրա խոսքերով, չնայած ընդհանուր դրական պատկերի առկայությանը, անհրաժեշտ է կատարել որոշակի աշխատանք, հատկապես առեւտրում տեխնիկական խոչընդոտների (Technical Barriers to Trade) եւ մտավոր սեփականության իրավունքի պաշտպանության ոլորտներում, որտեղ ազգային օրենսդրությունը պետք է փոփոխության ենթարկվի` ԵՄ-ի օրենսդրությանը համապատասխան:

“ՀՀ վարչապետի օգոստոսի 10-ի հրամանով մինչեւ տարեվերջ պետք է իրագործվեն մնացած պահանջները: Այս հանգամանքի լույսի ներքո, ես ակնկալում եմ համապատասխան հաստատում ստանալ մեր փորձագետներից”, - հայտարարել է Գունար Վիգանդը Մեդիամաքս-ի հետ հարցազրույցում:

“Թույլ տվեք ընդգծել, որ բանակցությունների սկիզբը միայն մեկ քայլ է ազատ տնտեսական գոտի ստեղծելու վերաբերյալ համաձայնագրի կնքման ուղղությամբ: Նոր տնտեսական հնարավորություններն ամբողջությամբ կիրառելու համար Հայաստանը պետք է ամբողջական բարեփոխումներ իրականացնի”, - եզրափակել է Գունարդ Վիգանդը:

Դեկտեմբերի 16-ին պատասխանելով Մեդիամաքս-ի հարցին` ՀՀ էկոնոմիկայի նախարար Տիգրան Դավթյանը հույս էր հայտնել, որ ԵՄ-ի հետ ազատ առեւտրային գոտի ստեղծելու վերաբերյալ բանակցությունները կսկսվեն 2012-ի առաջին կեսին: “Մենք իրականացրել ենք լայնածավալ աշխատանք եւ կարծում եմ, որ աշխատանքները նույն կերպ շարունակելու դեպքում կկարողանանք 2-3 տարվա ընթացքում բարեհաջող ավարտել բանակցությունները, որոնք սովորաբար տեւում են 5 տարի”, - ասել էր նախարարը: