Երեւան: Մեդիամաքս: ՀՀ Ազգային ժողովն այսօր ձայների 96 կողմ եւ 7 դեմ հարաբերակցությամբ արդարադատության փոխնախարար Արման Թաթոյանին ընտրել է ՀՀ մարդու իրավունքների պաշտպան:

ՀՀ մարդու իրավունքների չորրորդ պաշտպան Արման Թաթոյանն ընտրվել է փակ, գաղտնի քվեարկությամբ:

Օմբուդսմենի պաշտոնում Արման Թաթոյանի թեկնածությունն առաջադրել էր ՀՀԿ խմբակցությունը:

ՀՀ մարդու իրավունքների պաշտպանի պաշտոնը թափուր էր մնացել հունվարի 12-ին Կարեն Անդրեասյանի հրաժարականից հետո:

Արման Թաթոյանը ծնվել է 1981թ. դեկտեմբերի 18-ին Երեւանում:

2002թ. ավարտել է Երեւանի պետական համալսարանի իրավագիտության ֆակուլտետը, 2004թ.` նույն ֆակուլտետի մագիստրատուրան: 2007թ. ավարտել է ԵՊՀ իրավագիտության ֆակուլտետի Քրեական դատավարության եւ կրիմինալիստիկայի ամբիոնի ասպիրանտուրան: 2013թ. ավարտել է ԱՄՆ Փենսիլվանիայի համալսարանի Իրավունքի դպրոցը: Ունի պատվավոր մագիստրոսի կոչում:

ՀՀ արդարադատության նախարարի տեղակալի պաշտոնը զբաղեցնում է 2013թ. նոյեմբերից:

Արման Թաթոյանը 2013թ. նոյեմբերից նաեւ Մարդու իրավունքների եվրոպական դատարանում ՀՀ կառավարության լիազոր ներկայացուցչի տեղակալ է, ԵԽ ծրագրի միջազգային խորհրդական, 2005-ից` ԵՊՀ քրեական դատավարության եւ կրիմինալիստիկայի ամբիոնի դասախոս, այնուհետեւ դոցենտ: Դասախոսում է նաեւ Հայաստանի ամերիկյան համալսարանում եւ ՀՀ արդարադատության ակադեմիայում: