Երեւան: Մեդիամաքս: Եվրոպական Միությունը չի քննարկում Հայաստանի հետ Ասոցացման համաձայնագրի քաղաքական մասի ստորագրման հարցը:

Այդ մասին է վկայում ԵՄ արտաքին քաղաքականության հարցերով Գերագույն ներկայացուցիչ Քեթրին Էշթոնի մամուլի խոսնակ Մայա Քոչիյանչիչի պատասխանը Մեդիամաքս-ի հարցին:

Մեդիամաքս-ը դիմել էր Մայա Քոչիյանչիչին` խնդրելով մեկնաբանել ՀՀ վարչապետ Տիգրան Սարգսյանի հայտարարությունն այն մասին, որ Ուկրաինայի հետ Ասոցացման համաձայնագրի քաղաքական մասը ստորագրելու ԵՄ որոշումը «հնարավորությունների պատուհան» է բացում Հայաստանի համար: 

Ի պատասխան` Մայա Քոչիյանչիչն առաջարկել է ծանոթանալ նախորդ շաբաթ ԵՄ-Ուկրաինա գագաթնաժողովի արդյունքներով ընդունված հայտարարությանը, որում, մասնավորապես, ասվում է.

«ԵՄ-ն, նրա անդամ-երկրները եւ Ուկրաինան կստորագրեն Ասոցացման համաձայնագրի քաղաքական գլուխները: ԵՄ-ն եւ նրա անդամ-երկրները հավատարիմ են մնում Ասոցացման համաձայնագրի մնացած մասի եւ Խորը ու համապարփակ ազատ առեւտրի գոտու մասին համաձայնագրի ստորագրմանը, որը քաղաքական գլուխների հետ մեկտեղ միասնական գործիք է ձեւավորում»:

2013թ. սեպտեմբերին եվրահանձնակատար Շտեֆան Ֆյուլեն Մեդիամաքս-ի հետ հարցազրույցում ասել էր, որ «մենք չենք կարող մասնատել Ասոցացման համաձայնագիրը»: 

«ԵՄ հետեւողական դիրքորոշումն այն է, որ քաղաքական ասոցացումը եւ տնեսական ինտեգրացումը պետք է առաջ ընթանան միաժամանակ` հանդիսանալով Ասոցացման համաձայնագրի անբաժանելի մասերը: Այդ պատճառով, մենք չենք կարող առանձնացնել համաձայնագրի այս երկու կարեւորագույն բաղադրիչները»,- ասել էր Ֆյուլեն:

ԵՄ-ի հետ Հայաստանի Ասոցացման համաձայնագիրը, ներառյալ Խորը ու համապարփակ ազատ առեւտրի գոտին, նախատեսվում էր նախաստորագրել 2013թ. Վիլնյուսում Արեւելյան Գործընկերության գագաթնաժողովում: Մաքսային միությանն անդամակցելու ՀՀ նախագահի որոշումից հետո, որի մասին հայտարարվեց 2013թ. սեպտեմբերի 3-ին, ԵՄ-ն հայտարարեց Ասոցացման համաձայնագիրը նախաստորագրելու անհնարինության մասին: Արդյունքում Վիլնյուսի գագաթնաժողովում ստորագրվեց ՀՀ ԱԳ նախարար Էդվարդ Նալբանդյանի եւ ԵՄ արտաքին քաղաքականության հարցերով Գերագույն ներկայացուցիչ Քեթրին Էշթոնի համատեղ հայտարարությունը: