Երեւան: Մեդիամաքս: ԱՄՆ Միջազգային զարգացման գործակալության (USAID) փոխտնօրեն Իսոբել Քոլեմանն ասել է, որ «Հայաստանը շարունակում է ճնշման ենթարկվել Ռուսաստանի կողմից, որը ձգտում է սահմանափակել Երեւանի ընտրությունը՝ վերջինիս պահելով խորհրդային ժամանակաշրջանի տնտեսական եւ էներգետիկ հարաբերությունների տրամաբանության մեջ»։

«Մենք համարում ենք, որ Հայաստանը եւ նրա ժողովուրդը պետք է կարողանան ինքնուրույն ընտրել իրենց ուղին եւ բարձր ենք գնահատում Հայաստանի վճռականությունը՝ գնալ դեպի ավելի մեծ ազատություն եւ բարգավաճում սեփական պայմաններով», - ասել է Քոլեմանը՝ ելույթ ունենալով Վաշինգտոնում Հայաստանի դեսպանատանը Հայաստանի անկախության հռչակման 33-րդ տարեդարձին նվիրված միջոցառման ժամանակ։

«ԱՄՆ կառավարությունն անում է հնարավոր ամեն ինչ այս կարեւոր առաջընթացին աջակցելու համար՝ ապրիլին ԵՄ-ի հետ Հայաստանին աջակցելու համար պատմական եռակողմ հանդիպմանը մասնակցելուց մինչեւ հունիսին մեր երկկողմ հարաբերությունները պաշտոնապես Ռազմավարական գործընկերության մակարդակի բարձրացումը: Մեր հարաբերությունները թեւակոխում են ավելի լայն ու խորը համագործակցության նոր դարաշրջան, եւ Միացյալ Նահանգները հավատարիմ է Հայաստանին աջակցելուն»,- ասել է ԱՄՆ Միջազգային զարգացման գործակալության փոխտնօրենը։

Իսոբել Քոլեմանը նշել է, որ վերջին 4 տարիների ընթացքում ԱՄՆ-ի եւ Հայաստանի միջեւ ապրանքաշրջանառությունն ավելի քան եռապատկվել է՝ 2020 թվականի $‌96 միլիոնից 2023 թվականին հասնելով $‌321 միլիոնի, ինչը ամենաբարձր ցուցանիշն է  հարաբերությունների պատմության մեջ։