Երեւան: Մեդիամաքս: ԱՄՆ պետքարտուղար Էնթոնի Բլինքենը հեռախոսազրույցներ է ունեցել Ադրբեջանի նախագահի եւ Հայաստանի վարչապետի հետ։
Իլհամ Ալիեւի հետ Բլինքենի հեռախոսազրույցի մասին Պետդեպարտամենտի հաղորդագրության մեջ ասված է.
«Պետքարտուղարը ողջունել է նախագահ Ալիեւի հանձնառությունը Ադրբեջանի եւ Հայաստանի միջեւ կայուն եւ պատվաբեր խաղաղության համաձայնագրի ձեռքբերմանը: Պետքարտուղարն ընդունել է այն տառապանքները, որն այս երկարատեւ հակամարտությունը պատճառել է եւ՛ ադրբեջանցիներին, եւ՛ հայերին եւ ընդգծել է տարածաշրջանի համար խաղաղության օգուտները։ Պետքարտուղարը քննարկել է Ադրբեջանի հետ մեր ամուր հարաբերությունները, նշել վերջին մտահոգություն առաջացնող հարցերը, խոսել է համագործակցությունն ամրապնդելու հնարավորության մասին, հատկապես խաղաղ գործընթացի շուրջ, եւ բարձր մակարդակի ներգրավվածության կարեւորության մասին»:
Նիկոլ Փաշինյանի հետ Բլինքենի հեռախոսազրույցի մասին Պետդեպարտամենտի հաղորդագրության մեջ ասված է.
«Կողմերը քննարկել են Միացյալ Նահանգների աջակցությունը Հայաստանի եւ Ադրբեջանի միջեւ կայուն եւ պատվաբեր խաղաղության համաձայնագրի հասնելու ջանքերին։ Պետքարտուղարը վերահաստատել է Միացյալ Նահանգների շարունակական աջակցությունը Հայաստանի ինքնիշխանությանն ու տարածքային ամբողջականությանը եւ նշել է Հայաստանի հետ երկկողմ համագործակցության ընդլայնմանն ուղղված ջանքերը՝ որպես աջակցություն բարեկեցիկ եւ ժողովրդավարական ապագայի նրա տեսլականին»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: