Երեւան։ Մեդիամաքս։ Ռուսաստանի փոխարտգործնախարար Սերգեյ Ռյաբկովն ասել է, որ «Ռուսաստանը Հայաստանում իր դաշնակիցների ամենալուրջ ուշադրությունն է հրավիրել է այն փաստի վրա, որ ԱՄՆ-ի հետ նրանց զորավարժությունները Մոսկվայում ընկալվում են անհանգստությամբ»։

«Հայաստանը ՀԱՊԿ դաշնակից է, մենք ելնում էինք եւ շարունակում ենք ելնել նրանից, որ դաշնակցային ոգով անհրաժեշտ է հավատարիմ մնալ միության անդամների հետ վարժանքներ անցկացնելու պրակտիկային»,- ասել է դիվանագետը՝ պատասխանելով ՏԱՍՍ-ի հարցին:

Սեպտեմբերի 12-ին Ռուսաստանի նախագահի մամուլի քարտուղար Դմիտրի Պեսկովն ասել էր, որ Հայաստանի տարածքում հայ-ամերիկյան համատեղ զորավարժությունների անցկացման մասին տեղեկատվությունը «զգոնություն է պահանջում»։

«Իհարկե, նման լուրերը զգոնություն են պահանջում, հատկապես՝ ներկա իրավիճակում։ Ուստի մենք խորապես կվերլուծենք այդ լուրերը եւ կհետեւենք իրավիճակի զարգացմանը»,- նշել էր նա:

ՀՀ պաշտպանության նախարարությունից հայտնել են, որ Հայաստանում սեպտեմբերի 11-ից 20-ը հայ-ամերիկյան համատեղ զորավարժություն կանցկացվի:

Զորավարժության նպատակն է բարձրացնել միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում, իրականացնել կառավարման եւ մարտավարական հաղորդակցման լավագույն փորձի փոխանակում, ինչպես նաեւ բարձրացնել հայկական ստորաբաժանման պատրաստվածությունը ՆԱՏՕ/ ԳՀԽ «Օպերատիվ կարողությունների հայեցակարգ»-ի պլանային գնահատման համար»,- ասված է ՊՆ հաղորդագրությունում:

ԱՄՆ պաշտպանության նախարարության հաղորդագրության մեջ ասված է, որ «այս նախաձեռնությունը նպատակ ունի ամրապնդել մեր դաշինքը Հայաստանի հետ՝ կենտրոնացնելով ուշադրությունը փոխգործակցելիության եւ պատրաստվածության ամրապնդման վրա՝ մասնագիտացված խաղաղապահ գործողությունների ուսուցման միջոցով»:

Ամերիկյան կողմը հայտնում է, որ վարժանքին կմասնակցեն 85 ամերիկացի եւ 175 հայաստանցի զինծառայողներ: