Երեւան։ Մեդիամաքս։ Ադրբեջանի ԱԳՆ-ն հայտարարություն է տարածել՝ կապված Հայաստանում երկարաժամկետ առաքելություն ստեղծելու ԵՄ խորհրդի որոշման հետ։

Դրանում, մասնավորապես, ասվում է, որ «ԵՄ առաքելության տեղակայումը Հայաստանում պետք է ապահովվի՝ հաշվի առնելով Ադրբեջանի օրինական շահերը, եւ ԵՄ-ի կողմից նրա գործունեության իրականացումը չպետք է խաթարի փոխադարձ վստահությունը»։

«Հայաստանի տարածքում ԵՄ մոնիտորինգային գործունեությունը սկսվել է քաղաքացիական դիտորդական առաքելության տեղակայմամբ՝ հետեւելով 2022 թվականի հոկտեմբերի 6-ին Պրահայում Ադրբեջանի, Հայաստանի, Ֆրանսիայի ղեկավարների եւ ԵՄ խորհրդի նախագահի հանդիպման ժամանակ ձեռք բերված համաձայնությանը։ Ադրբեջանը համաձայնել էր այդ գործունեության իրականացմանը՝ ենթադրելով, որ այն կնպաստի կարգավորման գործընթացին։

Արտաքին քաղաքականություն | 2023-01-23 17:06:45

ԵՄ-ն ընդունեց Հայաստան երկարաժամկետ առաքելություն գործուղելու որոշումը

Չնայած երկամսյա առաքելության հստակ սահմանված պարամետրերի եւ նպատակների շուրջ համաձայնության բարձր մակարդակին, այն բանից հետո, երբ ԵՄ անդամ որոշ երկրներ կողմնակալություն ցուցաբերեցին, մոնիտորինգային առաքելության գործունեության մեջ սկսեցին նկատվել հակասություններ Պրահայում ձեռք բերված պայմանավորվածությունների հետ: Դա, իր հերթին, ազդեց ԵՄ-ում որոշումների կայացման գործընթացների թափանցիկության նկատմամբ ընդհանուր վստահության վրա»,- ասված է հայտարարության մեջ:

Փաստաթղթում նշվում է նաեւ, որ Հայաստանում ԵՄ առաքելության գործունեությունը «պատրվակ դարձավ Հայաստանի կողմից ստանձնած պարտավորությունների կատարումից խուսափելու համար»։

Հունվարի 10-ին Ադրբեջանի նախագահ Իլհամ Ալիեւը «խաբեություն» էր անվանել առանց Բաքվի համաձայնության Եվրամիության նոր քաղաքացիական առաքելության ուղարկումը Հայաստան եւ նշել, որ դա չի բարձրացնի տարածաշրջանի անվտանգությունը եւ բացասական ազդեցություն կունենա ԵՄ հովանու ներքո հայ-ադրբեջանական բանակցությունների վրա։